ovnis e isoglossas

Mudança

2005-06-09T15:47:00.000+01:00

Uns bons amigos oferecem-me um novo quarto para viver, numha casa melhor decorada e, sobre todo, plenamente normalizada, e eu, sem duvidá-lo, sem pensá-lo duas vezes, e agradecendo o convite, máxime tendo em conta que nom há que pagar aluguer, nem hipoteca, nem nada, mando-me mudar de contado.
Assim que visitade-me na nova casa. O meu quarto sigue aberto, enchendo-se, agora, nestas alturas do ano, com o cheiro, e o sabor, das cereixas.
E desculpai se nestes dias, com os trabalhos de levar as cousas dumha casa para outra, ando um pouco lento.

PD/ Já sabes que manhám é o dia de Camões, 10 de Junho? Pois entom também saberás que no 17 de Maio foi o Dia das Letras, nom? Pois entre essas duas datas é que existe a Temporada das Letras.

HqB: também no Berzo/ também do Berzo

2005-06-08T20:08:00.000+01:00

Para esta sexta-feira, dia 10, organizamos a projecçom de "Hai que botalos" no Berzo. Será em Ponferrada, a partir das 20'30h. nos locais do Conselho da Juventude.
Contamos contigo!

Viva o matrimónio?

2005-06-08T19:47:00.000+01:00

No ultimo número, o 36, do Abrente, o vozeiro de Primeira Linha, já disponível em papel, e na rede em pdf ou html, publico o artigo que agora reproduzo cá. O número completa-se com artigos Contra a mística e o idealismo no MLNG, de André Seoane Antelo; Algumhas notas para o debate a respeito do laicismo, de Domingos A. Garcia Fernandes; Processo de normalizaçom do euskara e construçom nacional, de Mikel Irastortza; O País Valenciano e a articulaçom dos Països Catalans, de Toni Gisbert; a Editorial sob o título de Nem espanholismo, nem autonomismo. Adiante com a nova esquerda independentista; e umha contra capa dedicada às eleiçons do 19-J na CAG: Vota NÓS-UP.

Viva o matrimónio?

A reforma do Código Civil espanhol (C.C.), aprovada no Congresso dos deputados no passado dia 21 de Abril, levada adiante polo Governo do PSOE, com o apoio doutras forças políticas, para legalizar os casamentos entre pessoas do mesmo sexo, outorgando-lhes todos os direitos inerentes à vinculaçom conjugal, é, em termos puramente técnicos, bem simples e singela. Basicamente, consistiu na modificaçom de muitos dos artigos do C.C., substituindo lá onde apareciam os termos "homem" e "mulher" por "cônjugue" ou "progenitor". O novo texto reformado, que o Governo considera que poderá beneficiar um número aproximado de quatro milhons de pessoas, concede os mesmos direitos em fiscalidade, heranças, pensons, adopçons por parte de casais, etc... aos até o de agora nom permitidos casamentos entre pessoas do mesmo sexo. O texto acha-se em trámite parlamentar, tendo de passar ainda polo Senado, para voltar mais tarde novamente ao Congresso, mas todo indica que a reforma será finalmente aprovada sem grandes complicaçons, dada a maioria que o PSOE e os seus sócios tenhem na Cámara.

Nom é o Estado espanhol o único que pretende realizar reformas semelhantes. Ainda que nom é informaçom amplamente difundida, som vários os estados de todo o mundo onde há, ou se prevê que venha a haver, reformas semelhantes e mesmo algum onde o casamento homossexual já está legalizado, como é o caso do Canadá, que analisa umha lei federal para os legalizar. A Holanda e a Bélgica fôrom os primeiros estados a eliminar qualquer distinçom entre homossexual e heterossexual, eliminando todas as referências de género nas leis de matrimónio, e na Dinamarca as unions civis com os mesmo direitos que o matrimónio realizam-se desde 1989, e outros países da sua área figérom o mesmo na decada de 90.

Resulta especialmente chamativo que no Estado espanhol umha reforma destas características, que supom um "fito histórico" segundo as declaraçons de alguns dos membros do Governo e do partido que o sustenta, tenha provocado tam poucas análises e reflexons, especialmente por parte da esquerda, das esquerdas, entendendo estas no seu mais amplo e plural significado, ao tempo que provocou um dos maiores debates, umha das mais azedas polémicas, especialmente mediáticas, dos últimos anos. Procurando nas hemerotecas ou na Internet, podemos encontrar centenas, dúzias de centenass, de declaraçons, a favor ou contra, mas practicamente nengumha análise, nenguma reflexom sobre o tema. Assim, por exemplo, surpreende que por parte da esquerda, ou quando menos daqueles sectores da esquerda que nunca fôrom excessivamente partidários da instituiçom do matrimónio tal e qual até agora a conhecíamos (o casamento heterossexual), e que criticava tal instituiçom por ser um alicerce básico do sistema patriarcal e umha célula fundamental para a reproduçom do sistema capitalista, a partir dessa esquerda, digo, surpreende que nom existam praticamente análises, sobre o tema. E ainda mais surpreende que nom exista nengum tipo de reflexom sobre os motivos que levam o PSOE a promover umha tal reforma, enfrentando-se nom só à direita e ultradireita política e sociológica e à Igreja católica e mesmo algumhas outras confissons religiosas, mas também a umha parte do seu eleitorado e dos seus membros (como se pudo ver ante as posturas mantidas por destacados militantes do PSOE como Francisco Vasques). Serám essas as duas questons fundamentais que pretende tratar este artigo, escrito tendo em conta que esta vai ser um dos grandes "contributos", umha das "promessas cumpridas", um dos temas-estrela, que o PSOE, e especialmente ZP, podam apresentar no fim do seu mandato.

Pode ser a instituiçom do matrimónio umha ferramenta de transformaçom social?

Comecemos por afirmar que é umha questom de justiça social o reconhecimento de direitos a colectivos dicriminados. Todas aquelas acçons que conduzam para evitar ou acabar com discriminaçons que impossibilitam a igualdade (mesmo que seja umha igualdade só formal e nom real) entre as pessoas som sempre passos positivos que devem ser valorizados como avanços importantes. A legalizaçom, com todos os direitos e deveres, dos casamentos entre pessoas do mesmo sexo, fruto das luitas e campanhas dos movimentos de gais e lésbicas ao longo de várias décadas, nom fai mais que acabar com umha evidente injustiça, que nom permitia (com base em razons morais, religiosas ou ideológicas), que um amplo colectivo de pessoas pudesse gozar dos mesmo direitos que outras por motivos da sua escolha sexual. Até aí estamos de acordo.

Umha das razons que esgrimia, e ainda esgrime, a hierarquia da Igreja católica para se situar contra os casamentos entre pessoas do mesmo sexo é que vai ser umha iniciativa que vai "destruir o matrimónio tal e qual até o de agora o conhecíamos". Converte-se esta numha razom para quem é a favor desta iniciativa e ao mesmo tempo é contra a instituiçom do matrimónio, quando menos o matrimónio tal e qual até agora o conhecíamos. A situaçom, para nos explicarmos melhor, é semelhante à que se criou quando ainda existia o Serviço Militar Obrigatório no Estado espanhol, quando havia um amplo e forte movimento contra o mesmo, e as mulheres começavam a incorporar-se ao exército. Era positivo, era defendível, era revolucionário, que as mulheres tivessem que fazer também a mili, ou que se incorporassem ao exército? Era sem dúvida um reconhecimento dos direitos das mulheres, mas era um passo adiante?

Neste caso sucede o mesmo: porque o movimento das lésbicas e os gais (ou, quando menos, umha parte destacada do mesmo), tem tanto interesse em participar dumha instituiçom tam retrógrada, tam patriarcal, tam capitalista como o matrimónio? Nom teria sido muito melhor um movimento que questionasse essa instituiçom, de origem evidentemente religiosa, na procura dumha outra forma de relaçom social, muito mais livre, muito mais democrática, muito mais progressista? Evidentemente, nem só as pessoas homossexuais som as que deveriam ter criado esse debate, mas o conjunto das pessoas, organizaçons, colectivos e movimentos que nos definimos como contrárias ao mundo capitalista actual, o mundo realmente existente, e luitamos por um outro mundo possível. E pode que aí tenhamos a resposta.

Os e as homossexuais nom som, per se, transformadores. É umha evidência, mas muitas vezes as evidências som questons que há que deixar patentes porque se esquecem com facilidade. As organizaçons de gais e lésbicas que com mais decisom apoiárom e defendêrom publicamente a reforma do C.C., aquelas que nom tenhem reparos em mostar a sua proximidade com o PSOE, ou em menor medida com I.U. como sócio do anterior, nom som, nem muito menos, organizaçons transformadoras, mas puramente reformistas. Umhas declaraçons de Beatriz Gimeno , recém eleita, por segunda vez consecutiva, Presidenta da Federaçom Estatal de Gais, Lésbicas e Transexuais (Felgt), que agrupa 32 associaçons, resultam esclarecedoras. Perguntada sobre a anunciada manifestaçom que a ultradireita espanhola convoca para 18 de Julho em Madrid contra a reforma do C.C. e do casamento homossexual, a sua resposta é: "Nós respeitamos que se manifestem. Mas os direitos nom se ganham na rua, ganham-se no Parlamento". E ainda, mais adiante, afirma que "as associaçons (de gais e lésbicas) vamos ter que mudar a forma de actuar (...) Passamos dumha luita de trincheiras (...) a umha luita mais de gabinetes, projectos e programas; mais social e de colaboraçom com as instituiçons". Como tem acontecido noutras ocasions de governos social-democratas, a "institucionalizaçom" dos movimentos sociais, a sua integraçom na vida dos gabinetes e a sua desapariçom do espaço próprio dos mesmos, a rua, é um dos objectivos das políticas governamentais.

E é que, homossexual ou heterossexual, o casamento continua a ser umha instituiçom básica para perpetuar a actual ordem social. E isso nom vai mudar case quem casar. Umha outra cousa é que se adapte às mudanças sociais ou nom. Mas o que nom é é umha ferramenta para transfomar a sociedade. Antes ao contrário.

Resulta evidente que para o conjunto do movimento gai e lésbico, era muito difícil nom entrar na polémica suscitada por esta iniciativa do PSOE, tendo em conta as barbaridades que por boca de diferentes representantes da direita e da Igreja católica, fundamentalmente, apareciam na imprensa, pretendendo, e parcialmente conseguindo, criar um certo clima de confusom e crispaçom. Assim, por exemplo, José Luis Requero, relator da Comissom de Estudos e Informes do Conselho Geral do Poder Judicial (CGPJ), chegou argumentar que permitindo os matrimónios homosexuais o Estado se veria indefenso ante outras possibilidades que poderiam aparecer no futuro, como a petiçom de legalizaçom da poligamia por parte da comunidade mussulmana, ou dos casamentos entre irmaos, ou da uniom entre pessoas e animais; posteriormente a tal comissom aprovou um "estudo jurídico" que tratava o tema nos mesmo termos, com os votos dos vogais propostos polo PP. Nos mesmos dias, Fraga Iribarne, ex-ministro franquista e actual presidente da Junta da Galiza, afirmava que ser gai é "umha anomalia dos cromossomas", considerando "um erro" reinvindicar o orgulho gai . Declaraçon em sintonia com as realizadas por Jesús Catalá, bispo de Alcalá, que defendeu que "ser homossexual é umha anormalidade psicológica" . Enquanto isso, o recém eleito Papa da Igreja católica, Ratzinger, fazendo gala das doutrinas mais rançosas e decadentes, acusava Zapatero e o seu governo de pretender "destruir a família", e membros da cúria definiam a reforma do C.C. como "umha vergonha", "um cancro", umha lei "injusta e prejudicial", "mostra dumha Europa em decadência", e realizavam apelos ao funcionariado para exercer umha hipotética obejcçom de consciência para impossibilitar de facto que se podam levar a efeito as reformas.

Fôrom muitas as declaraçons da ultradireita contra os direitos das pessoas homossexuais, e nom é possível, nem recomendável, reproduzi-las todas. Mas acabemos com as de Lluís Fernando Caldentey, presidente da Cámara de Pontons (Barcelona) polo Partido Popular, que chegou a afirmar que "um gai é umha pessoa tarada, que nasce com umha deformaçom física ou psíquica".

Com toda a probabilidade, após toda esta polémica, o que sucederá é que, logo que deixe de ser notícia e merecedora de manchetes, a discriminaçom por motivos de escolha sexual, que seguirá a existir, fique silenciada nos meios. Porque as campanhas de propaganda (e a ultradireita tomou este tema como umha campanha de propaganda) tenhem sempre data de caducidade. Nom pensava o PSOE que quem lhe ia fazer a campanha publicitária sobre as suas "promessas cumpridas", e grátis, eram o PP e a Igreja católica. Porque o PSOE também tomou este tema da mesma forma: como umha campanha de propaganda.

Umha mostra de mudança de talante para que todo continue na mesma

E é que a reforma do C.C. que vai permitir o casamento homossexual nom é mais do que umha nova mostra do mudança de talante. Umha nova mostra da política de ZP e o seu governo: modificaçons epidérmicas, política de salom de beleza, que permite vender a imagem dum governo progressista, comprometido com os movimentos sociais e com os colectivos discriminados, e sem custos de nengum tipo, enquanto na camada profunda da pele, na derme, onde estám os vasos sanguíneos e os nervos, todo continua exactamente na mesma. Umha grande campanha de publicidade para vender, num novo invólucro e com umha nova marca, o mesmo produto que já vendeu o PP, e antes o PSOE nos seus governos felipistas.

Na política económica, na política laboral, na política internacional, na questom nacional, poucas mudanças, ou nengumha. O mesmo ZP que nom tem problemas em fotografar-se com os sectores mais "yuppies" e burgueses do movimento gai é o mesmo que declara que nom tem intençom de rebaixar o horário laboral; antes o contrário: há que trabalhar mais. O PSOE, nesta nova etapa de governo, sabe que precisa de acumular e consolidar os votos progressistas e juvenis que lhe permitírom ganhar as eleiçons de Março de 2004, para poder chegar às próximas eleiçons com um apoio que lhe garanta a consecuçom dumha maioria absoluta e desfazer-se dos seus actuais, e incómodos, sócios de governo (ERC, IU,...). Para tal, deve combinar as políticas neoliberais que vem aplicando com campanhas de publicidade e cortinas de fumo que lhe permitam consolidar a sua imagem de força distinta, diferente, mesmo contrária, às políticas do PP. A reforma do C.C. para permitir o casamento homossexual é o melhor exponente disto.

Fala Ceive ante as eleiçons na CAG

2005-06-06T16:27:00.000+01:00

Com motivo das eleiçons autonómicas na Comunidade Autónoma Galega o próximo 19 de Junho, a Associaçom Cultural Fala Ceive do Berzo tem-se dirigido aos partidos políticos que participam nas mesmas para fazer-lhes chegar umha série de consideraçons e propostas em torno da língua galega.

Em primeiro lugar, Fala Ceive solicita um maior compromiso activo na protecçom e fomento da língua galega no Berzo. Entende a entidade normalizadora berziana que na previsível futura reforma do Estatuto de Autonomia da CAG deve constar, expresamente e com toda claridade, a determinaçom institucional em defesa do chamado "galego estremeiro", quer dizer, a língua galega falada nos territórios galegófonos baixo administraçom nom-galega do Eu-Návia (nas Asturies), o Berzo e A Seabra (em Castela e Leom) e no Val de Elhas (na Estremadura). Neste sentido, Fala Ceive reclama que se diferencie, para aplicar as planificaçons normalizadoras oportunas, entre a problemática lingüística destes territórios, do chamado "galego exterior" (denominaçom na que se recolhe a existência da língua galega na emigraçom, nos leitorados de língua galega em diversas universidades do mundo inteiro, nas actividades que poda levar avante o Instituto Cervantes ou outro semelhante, etc...).

Fala Ceive também incide na necessidade de estreitar as relaçons sociais, económicas, culturais, lingüísticas,... entre as comarcas da CAG e os territórios da faixa oriental, de cara a superar os atrancos administrativos que provocam os actuais limites interautonómicos. Por este motivo, proponhem-se activar e potenciar o estabelecimento de convénios de colaboración interinstitucionais, que no caso da comarca berziana deveriam assinar-se com o Conselho Comarcal, os concelhos berzianos, a Junta de Castela e Leom, a Deputaçom leonesa, a Universidade de Leom, etc... Convénios que deveriam referir-se a materias tais como o ensino do galego, cultura (doaçons de livros e intercámbios culturais), recuperaçom toponímica, uso da língua galega nas administraçons locais, turismo (promoçom comum, férias,...) infraestruturas (estradas, internet rural, meios de comunicaçom, caminhos de ferro,...), etc., bem como a gestom de programas europeus comum ou a criaçom de mancomunidades interautonómicas de concelhos.

Fala Ceive solicita dos partidos políticos da CAG que realicem umha defesa da unidade lingüística do galego, incluindos as problemáticas dos quatro territórios que ficam fora da actual Comunidade Autónoma Galega. Para esta defesa, considera que ante qualquer ataque institucional ou discriminaçom lingüística, bem individual ou bem colectiva, devem aproveitar-se os foros existentes, tanto os políticos (Parlamento Galego, Parlamento espanhol, Parlamento Europeu), como judiciais (tribunais autonómicos e estatais).

Por último, a associaçom cultural berziana sugire aos partidos políticos da CAG que nom mantenham contactos nem realicem pactos políticos com o leonesismo político (representado pola Unión del Pueblo Leonés e a sua secçom juvenil, Conceyu Xoven), ante a irracional campanha em contra da língua e cultura galega do Berzo e os direitos das pessoas galegofalantes do Berzo, que estas formaçons realizarom no passado mês de Maio (tal e como se pode comprovar consultando a imprensa e os meios electrónicos dos dias 19 a 22 de Maio). Fala Ceive considera que nom se podem manter relaçons com umha formaçom política inimiga da cultura galega e negadora da realidade socio-lingüística berziana mentres nom mudem a sua actitude hostil, e cesem na sua perseguiçom do ensino da língua galega no Berzo, pretendendo destruir a unidade lingüística do galego frente ao leonés.

MAIS galego no ensino, já!

2005-05-31T15:28:00.000+01:00

Fala Ceive vem de reclamar publicamente a "ampliaçom do ensino da língua galega a todos os centros educativos nom universitários do Berzo ocidental", para consolidá-la, definitivamente, e fazer que perda o carácter experimental temporal que tem até o de agora, fruto do Acordo de Cooperaçom assinado entre a Junta de Galiza e a Junta de Castela e Leom, atendendo aos direitos lingüísiticos da comunidade berziana galego-falante.
Num escrito dirigido à Comissom Mixta de Seguimento para a promoçom do ensino da língua galega no Berzo, integrada pola Conselharia de Educaçom da Junta da CAG e a Conselharia de Educaçom da Junta da CACyL, a Associaçom Cultural Fala Ceive do Berzo solicita que se amplie o ensino da língua galega a todos os centros educativos nom universitários do Berzo ocidental, para evitar as actuais desigualdades na implantaçom desta matéria, que ainda nom está presente nos colégios das localidades galegófonas de Carracedelo, A Veiga de Valcarce, Quilós e a Veiga de Espinhareda, onde si existem maes e paes interesad@s em que se imparte essa matéria.
Ademais desta importante solicitude, Fala Ceive também lhe traslada ao citado organismo outras petiçons, como a realizaçom dumha necessária campanha informativa sobre o ensino da língua galega na nossa comarca, no sentido da resoluçom do Procurador do Comum de Castela e Leom, na que instava à Direcçom Geral de Planificaçom e Ordenaçom Educativa da Junta de Castela e Leóm a realizar tal campanha. Neste sentido, Fala Ceive também reclama que as páginas web dos centros educativos nos que já está implantado o ensino da língua galega recolham informaçom sobre essa oferta escolar.
Por último, Fala Ceive considera importantíssimo que se convoquem com regularidade anual os cursos de formaçom do profesorado em língua galega, a través do Centro de Formaçom e Inovaçom Educativa (CFIE), possibilitando que o profesorado adquira os conhecimentos necessários de língua e cultura galegas, propondo, ao mesmo tempo, a criaçom dum Departamento Didáctico de Língua Galega no CFIE, no que se integre todo o profesorado desta matéria no Berzo, para coordinar a formaçom do mesmo, programar actividades conjuntas, realizar materiais pedagógicos, etc...

Agora, falta por saber, como sempre, se as instituiçons involucradas (Junta e Junta, ambas em maos do PP) tenhem em conta estas petiçons ou, mais umha vez, fam ouvidos xordos. A Junta da CAG também nom tem muitas possibilidades de dizer oficialmente que nom tendo em conta que algumhas destas petiçons (como por exemplo, o início de conversas e negociaçons para a implantaçom da língua galega em todo o ensino nom universitário) já aparece recolhido no seu flamante Plano de Normalizaçom Lingüística, aprovado, lembremo-lo, no Parlamentinho de Cartom por todos os grupos presentes no Hórreo (PP, BNG e PSOE). Veremos se é papel molhado ou tenhem intençom séria de levá-lo avante.

Mentres, no Berzo ainda há alguns que querem seguir com a absurda polémica da "impossiçom do galego normativo", e o professor J. A. Balboa de Paz escrevia onte no DiáriodeLeom sobre o tema, criticando, finalmente, que a língua galega seja umha língua real, e nom um conjunto inconexo de dialectos locais ou comarcais. "El gallego, en su variedad dialectal berciana, es parte del patrimonio cultural del Bierzo Oeste y como tal debe ser preservado por las instituciones y por el pueblo. Es más, el gallego normativo -no hay que confundir lengua y habla- puede ser una asignatura en el programa educativo de los bercianos, porque vivimos en una zona de contacto con esa comunidad, y esto facilita las relaciones y es en definitiva un bien". Com toda provabilidade, nom se preocuparam muito de saber se o espanhol que os rapazes e as rapazas berzianas aprendem no colégio é o espanhol dialectal do Berzo, de Salamanca, ou de Múrcia, aceitando, acriticamente, a impossiçom do "espanhol normativo", que nom é próprio desta comarca. Claro que de quem comeza um artigo com o típico tópico de que "las lenguas, antes que cualquier otra cosa, son herramientas para la comunicación entre los hombres", para depois pontoalizar com o nom menos tópico de que "esa riqueza lingüística de nuestro país debe preservarse pero no debe ser un arma, como quieren los nacionalistas, para la desintegración nacional", nem se pode, nem se deve aguardar muito.

Divertimentos

2005-05-30T15:32:00.000+01:00

Andivemos a jogar na escola com a literatura, e isto foi algumhas das cousas que escrevim. Tratava-se de continuar o escrito em negrito.

O médico remata de examinar-me e tranqüilizar-me: nom é grave, numha semana estarei bem. Eu desconfio. Quando me fala fai-no como se nom falara comigo. Como se falará só.
Além do mais, na porta do seu gabinete há um cartaz que di: "Dr. Rodríguez. Médico-forense".

Num pequeno povo de Escócia vendem livros com umha página em branco perdida polo meio do volume. Todo o mundo pensa que detrás se agacha um grande mistério, mas o único certo é que o dona da imprensa despediu ao revisor das provas e já nom tem ninguem que controle os trabalhos que se fam na sua empresa.

Outro dia, mais.

Torradeira do pam

2005-05-26T16:04:00.000+01:00

Umha das vezes
a voz saiu da torradeira do pam
Já sabedes
esse aparelho que torra o pam
com umhas resistências eléctricas

Ele
como todas as manhás
ia almoçar
e meteu as fatias de pam na torradeira
e carregou no botom
Nesse momento
a torradeira começou a falar
"Nego-me a acreditar nos venenos. Desde a conquista espanhola o meu povo ri idiotamente por umha grande ferida. Quase sempre é de noite..."
Ele gostava do pam no seu ponto justo
No que ele considerava o seu ponto justo
3 minutos
Aos 3 minutos as fatias de pam saltárom
e a torradeira deixou de falar

Ficara os três minutos absorto
a escuitar a torradeira
Sem pensar
pegou em duas novas fatias e meteu-nas na torradeira
Carregou no botom
Novamente falava
"O viageiro encaminha-se através da espiral embora nom
lembra quando e onde penetrou.
Supom que o caminho tem forma de espiral..."
Novamente aos 3 minutos saiu o pam quente
torradinho
tal e como ele gosta
Instintivamente
deu-lhe à rodinha até os 6 minutos
"O pam sairá mais torrado"
pensa
"mas a voz nom parará tam rápido"
Mete as fatias
desejoso de ouvir novamente aquela voz
espectacularmente preciosa
que lhe fala
a ele
Carrega no botom

Passam as horas
A escuitar a voz
e a pensar na sorte de ter mercado
ontem mesmo
dous pacotes de pam de forma

Línguas, mentiras e miles de euros

2005-05-21T15:27:00.000+01:00

A UPL sigue erre que erre e da-lhe que da-lhe. Como dizia o outro, nom pode ser que a realidade lhes arruine um titular de imprensa. Para isso existe um cóctel milagroso, que eles nom inventarom, tudo tem que ser dito, composto por três partes de manipulaçom, cinco ou seis (ou mais, segum os gostos do pessoal) de mentira e umha grande porçom, muito grande, de ignoráncia supina (essa ignoráncia tam cotizada, e que com tanto esmero cultivam algumhas pessoas).

Se nestes días passados era o Presidente da direita leonesista, Melchor Moreno, que mostrava publicamente a faze mais retrograda, cazurra e cavernícola da sua formaçom, declarando barbaridades que muitas pessoas pensavamos já erradicadas de qualquer discurso político racional ("es una aberración cultural la imposición del gallego en las escuelas del Bierzo"), hoje quem sai à cena meiática é o Joaquin Otero, Secretário Provincial desta (de)formaçom, quem publicamente exige que a Junta de Castela e Leom nom sufrague o ensino da língua galega no Berzo, porque, explica, "há outras prioridades". Nom contento com isso, também se soma ao carro do seu Presidente, e dí (sempre em perefeito espanhol, claro, que o "llïonés" fica para os livros de história), que no Berzo nom se fala galego, nem sequera em Vila Franca (de onde é natural a sua família), e que em todo caso o que se fala é "una variedad dialectal galaica pero mezclada con el leonés, que nada tiene que ver con el gallego de la Academia de la Lengua Gallega, el de Santiago de Compostela". Já se podem vostés imaginar, sofridos leitores deste humilde blog, que as demais declaraçons siguem por esse caminho... Às vezes dam ganhas de pedir que o falar nom seja gratis, que haja que pagar por palavra pronunciada, a ver se assim alguns pensam duas vezes as cousas antes de dizé-las.

Mas o realmente escandaloso é que se atreva a pedir-lhe à Junta de Castela e Leom que nom invista dinheiro na ensinança da nossa língua na nossa comarca, porque há outras prioridades, quando o certo é que tal e como desvelava o Diario de León há uns días, os practicamente 600 alunos e alunas de língua galega em diversos centros de ensino na comarca custam-lhe a ridícula quantidade de... 9000 euros! Um milhom e meio das antigas pesetas! Já podem vostedes imaginar quem corre com os gastos que supom promover a língua galega nos colégios e liceus, graças a um convénio assinado entre as administraçons autonómicas da Comunidade Autónoma Galega (CAG) e da Comunidade Autónoma de Castela e Leom (CACyL).

Como nota discordante ante tanta estupidez e idiotez, merece ser destacada, por umha banda, a publicaçom dum artigo (em espanhol, imaginamos que por imperativo legal) do Quique Costas no Diario de León de hoje, baixo o título de A língua galega também é do Berzo ("La lengua gallega también es del Bierzo"): "Lo que no tiene explicación es que este político leonesista pretenda ilegalizar una de las riquezas culturales de su país, sobre todo cuando hoy son más los bercianos que estudian gallego que los que en El Bierzo votan leonesista. El Bierzo tiene una parte occidental de lengua gallega que enriquece la pluralidad cultural de León, porque el gallego no es sólo lengua de Galicia, también lo es de León (y de Asturias, Zamora y Extremadura). Entender esto es querer entenderse. Despreciar e ilegalizar esta realidad demuestra la burda ignorancia que exhibe este político". Evidente resulta que há muitas questons, ou melhor digamos: algumhas questons, nas que nom coincidimos com Quique Costas. Evidente resulta também que há algumhas, ou melhor digamos: muitas, nas que sim.

E, por outra banda, merece também um comentário o pronunciamento de Izquierda Unida de Leom ante o tema que nos ocupa. A mais de um nos surprenderá, mas o certo é que aí está, nom é um desvario fruto da minha imaginaçom. Um comunicado público no que afirmam que "a UPL minte quando declara que no Berzo nom se fala galego", e no que mostram o seu apoio ao fomento e à promoçom da língua galega na nossa comarca. Segum declara o Conselho Político provincial de Leom, por boca do seu membro Aniceto Reyes, "el gallego no es en ningún caso una lengua impuesta en la comarca. La lengua y cultura gallegas son propias, autóctonas, de nuestra comarca, y como tal deben ser reconocidas, protegidas y fomentadas. Es de justicia, por tanto, reconocer los derechos lingüísticos y culturales de los y las gallego-hablantes de esta comarca, y recoger en el Estatuto de Comarcalización y en el Estatuto de Autonomia de Castilla y León esa realidad, junto con el hecho diferencial de la propia Comarca del Bierzo". Umha oportuna declaraçom de apoio à reivindicaçom lingüística galega que mesmo no PGL tem merecido umha notícia.

E é que, como alguém di num comentário publicado no DiariodelBierzo, resulta incrível que ainda haja gente sensata na meseta!

Da-lhe que da-lhe...

2005-05-20T16:05:00.000+01:00

Pois sim, ainda há algumha cousa peor que um político ignorante a falar do que nom sabe: às pessoas que lhe fam caso, ainda sabendo que minte.

Por sorte, siguem aparecendo mais medicamentos, remédios e vacinas contra a ignoráncia, mas a questom é que já imos começar a pensar que nom é ignoráncia, que se trata de algumha cousa peor.

Parece que a UPL tem interese em continuar com esta absurda, e falsa, polémica. Mas no Berzo as cousas vam por outros caminhos. Eles nom o sabem, porque nom consiguem mirar mais alá do Mançanal, mas assim é. Como dizia o outro: nós, ao nosso.

Saude e Língua!

Ráncia ignoráncia

2005-05-19T14:27:00.000+01:00

Só há umha cousa peor que umha pessoa ignorante a falar do que nom sabe, e é um político ignorante a falar do que nom sabe.
Por sorte, a ráncia ignoráncia tem cura. Alguén deveria receitar-lhes remédios ou vacinas.

Se vostede é das pessoas que pensa que nom entende galego, pese a estar lendo este blog, procure nos remédios. Se nom, procure nas vacinas. Os componentes som os mesmos, mas a apresentaçom do medicamento varia.

; )

Saude e Língua(s)

2005-05-18T12:42:00.000+01:00

Nom se entende bem como é que resulta tam recorrente entre as pessoas contrárias ao reconhecimento e normalizaçom da língua galega no Berzo (algumhas abertamente anti-galeguistas, outras disfarçadas de leonesistas), essa falácia que supom que a má saude da nossa língua no Berzo vai supor umha melhoria para a saude da língua leonesa, ou astur-leonesa.Nom é certo. É umha mentira, empregada abundantemente, que nom tem consistência algumha a pouco que se reflexione sobre ela.

A saude do astur-leonés nom tem nada a ver com a situaçom da língua galega, e viceversa. Os defensores da língua galega como língua própria e autóctona do Berzo nom estaremos mais contentos polo facto de que o astur-leonés nom tenha reconhecimento por parte das autoridades leonesas e castelam-leonesas.

A situaçom do astur-leonés é grave, bem certo. Mas disso nom tem culpa a língua galega. A culpa será da sociedade leonesa e castelam-leonesa, que nom é quem de promover a sua difusom, promoçom, normalizaçom, protecçom... E, por suposto, das autoridades e instituiçons que nom cumprem com o que deveria ser o seu dever: a defesa do património histórico, e dentro del, da língua leonesa.

Vem isto a conto pola suposta polémica que algumhas pessoas querem criar com a aprovaçom por parte da Presidência do Conselho Comarcal do Berzo dumha declaraçom institucional bilíngüe, com motivo do 17 de Maio, Dia das Letras Galegas. O Conselho Comarcal, ao contrário que outras administraçons e instituiçons que padecemos nesta comarca (a saber: a Deputaçom de Leom, a Junta de Castela e Leom, muitas das instituiçons locais, e algumhas outras como a Universidade de Leom, etc...) parece que sim quer defender o património histórico berziano, e dentro del, especialmente, a língua galega. Isso nom é criticável.

Nom temos os defensores da língua galega no Berzo nengum problema em reconhecer a existência, e necessidade de protecçom em diversos ámbitos e por parte de diferentes organismos, da língua leonesa. Mas o que nom tem sentido é pretender enfrentar estas duas línguas (minorizadas) mentres a língua dominante, a língua que realmente se acha em possiçom de poder e hegemonia sigue avançando sem atopar practicamente resistências e contando com o beneplácito das instituiçons, organismos e grande parte da sociedade organizada (partidos políticos, sindicatos, associaçons de diversos tipo, etc...).

Devem convencer-se os leonesistas de que a má saude do galego, ou galego-português, nom vai supor a boa saude do leonés ou astur-leones. Pretender avançar seguindo o modelo asturiano (onde os asturianistas mais descerebrados malgastam o seu tempo em atacar a língua galega, em vez de em defender a sua língua, mesmo hoje nom oficial), é um suicídio para o movimento de defesa do leonés.

Negar a existência do galego no Berzo é umha barbaridade tam grande como pretender que Astorga é umha cidade galego-falante. O leonesismo político, representado pola UPL, fai-lhe um favor bem cativo às pessoas que defendem um Berzo leonés ao renovar a sua web e falar exclussivamente do leonés, ou astur-leonés. E, ao mesmo tempo, fai-nos um grande favor às pessoas que pensamos que a comarca do Berzo deve ser, também oficial e administrativamente, parte da Comunidade Autónoma Galega, pois parte da Galiza já o é por motivos históricos, políticos, culturais, lingüísticos, sociais, etc... E também, pola desatençom e abandono, pola negaçom da sua identidade e história, pola destruçom da sua memória, que sofre por parte de Leom e de Castela e Leom.

Mas em todo caso, o Berzo será o que voluntariamente os e as berzianas, as pessoas que vivemos e trabalhamos no Berzo, queramos que seja. Os leoneses, parecem querer, a dia de hoje, que o Berzo nom seja Leom. Isso, também, nom é criticável.

O dia do Dia das Letras

2005-05-17T12:40:00.000+01:00

Neste ano há no Berzo umha intensa actividade a propósito do Dia das Letras. Galegas, evidentemente. Já falamos dos actos organizados por Fala Ceive na semana passada, e de como os meios de comunicaçom, sobre todo as rádios, se mostrarom interesados no tema. Onte mesmo, houvo umha tertúlia em Onda Berzo (Punto Rádio), sobre a língua e a comarca do Berzo, onde estavamos presentes membros de FC, da nova asociaçom da língua Xarmenta, pais de alunos de língua galega, mestres, etc... É umha tertúlia que tem lugar todos os anos, coincidindo com o Dia das Letras, sempre em galego, graças ao trabalho do jornalista Ricardo Temez.

E hoje, os meios da comarca recolhem a declaraçom institucional bilíngüe do Conselho Comarcal do Berzo, no que a citada instituiçom reivindica, por um banda, que na próxima e ineludível reforma da Lei da Comarca do Berzo conste um reconhecimento específico da nossa língua, por ser língua autóctona do Berzo, e por outra reclama competências em materia lingüística para proteger e fomentar a língua galega em ámbitos como o ensino, a administraçom, ou a toponímia. É importante reconhecer os pasos, pequenos a primeira vista, mas de grande calado e transfondo, de esta instituiçom pública berziana (a única que tem como ámbito de actuaçom o conjunto da comarca), polo que supom de apoio e de normalizaçom da língua galega. Lembremos que o Presidente do Conselho Comarcal, Ricardo González Saavedra, estivo presente nos actos de celebraçom do Dia das Letras organizados por Fala Ceive na sexta-feira passada, reafirmando o seu compromisso pessoal e institucional com a reinvindicaçom e defesa da normalizaçom lingüística, com completa normalidade.

E ainda que os meios insistem em seguir oferecendo maioritariamente o discurso de que a defesa da língua galega no Berzo vem dada pola proximidade da Galiza administrativa, e nom por ser o galego língua própria e autóctona do Berzo, o certo é que pouco a pouco, sem grandes avances dum dia para outro, mas também sem pausa, a reivindicaçom da língua e cultura galegas, da língua e cultura próprias do Berzo, vai ocupando o lugar que lhe corresponde na realidade diária da comarca. Nisto, coincidiamos onte na tertúlia de Onda Berzo todas as pessoas participantes. E aí está também hoje o artigo de Rafa Adán no Diario de Leon, falando do Dia das Letras, e insistindo em que a chave da defesa e promoçom da nossa língua na nossa comarca está nos e nas galego-falantes berzianos/as. Em que com orgulho, e com completa normalidade e liberdade, podam (podamos) exibir diariamente a condiçom de galego-falantes.

E ainda, por seguir a falar das celebraçons do Dia das Letras no Berzo, temos que fazer mençom aos actos organizados polo Departamento de Galego da Escola Oficial de Idiomas de Ponferrada, e que se celebram durante todas esta semana.

Se de ano em ano, dum 17 de Maio para outro, devemos analisar o trabalho feito e o trabalho por fazer, devemos concordar, sem cair em triunfalismos falsos e inecessários, em que algum bom trabalho devermos ter feito as pessoas implicadas neste tema na nossa comarca, para poder ter presenciado um Dia das Letras no Berzo com tantas celebraçons, actividades e novidades. O futuro, mais umha vez, depende de nós. No caminho, teremos de encontrar-nos, para avançar juntos. Estou convencido.

Oferece-se blogueiro sem conhecimentos...

2005-05-16T15:06:00.000+01:00

Já vedes polo comentário anterior que o meu controlo do blospó é bem cativo... Que se lhe vai fazer!
Menos mal que a foto saiu noutros meios.
Prometo aprender um pouco mais, mas mentres tanto lembrai essa legenda que figura baixo o nome do blog: "alguem sabe como funciona isto?".

; )

Sucesso

2005-05-14T10:27:00.000+01:00

http://www.diariodeleon.es/graficos/2005/05/14/db14p12f4.jpg">

Umha ateigada sala de actos da Obra Social de Caja Espanha em Ponferrada, onde muitas pessoas tiverom que ficar de pé ante a falta de cadeiras, acolheu onte, 13 de Maio, a celebraçom do Dia das Letras no Berzo, organizada pola Associaçom Cultural Fala Ceive.

Desde os primeiros minutos das sete da tarde, dúzias de pessoas acodiam ao local onde tiverom lugar os actos, e polo que passarom nom menos de cento sessenta pessoas, entre elas algumhas autoridades, que quigerom reconhecer assim o trabalho realizado por esta Associaçom Cultural, como o Presidente do Conselho Comarcal, Ricardo González Saavedra (na foto a saudar à apresentadora e coordenadora do acto, Sílvia Ribas). Também estavam presentes algumhas das organizaçons, entidades e colectivos que tenhem colaborado com Fala Ceive para levar adiante esta celebraçom e outras actividades de defesa da língua.

Mas os verdadeiros e verdadeiras protagonistas forom as crianças dos diversos centros públicos de ensinança, que participarom na celebraçom e que recolherom, para alem dos agasalhos com os que os obsequiou Fala Ceive, os aplausos dum público, de aquem e alem O Cebreiro, emocionado e completamente entregado no apoio à defesa, promoçom e dignificaçom da nossa língua nacional.

As intervençons dos responsáveis da revista A Curuxa (a primeira revista escolar do Berzo editada em língua galega), as intervençons dos/as poetas e músicos convidada/os completarom um acto que foi pechado com a música dumha banda de gaitas do Berzo, e que continuou mais tarde com uns vinhos e uns petiscos de confraternizaçom entre as pessoas participantes.

Diversos meios de comunicaçom, da rádio, da imprensa e da televissom, assim como de meios electrónicos, recolherom a celebraçom deste acto, e entrevistarom ao longo do dia a responsáveis de Fala Ceive para recolher as suas opinions sobre a actual situaçom da língua galega no Berzo.

Com actos como o de onte, com certeza, a nossa língua seguirá viva no Berzo, com o compromisso activo e militante, com a vontade, e com a ilussom dumha associaçom cultural como Fala Ceive e os seus e as suas membros. E, por suposto, com as crianças, que som o futuro, a engrossar as fileiras da defesa do galego também no Berzo.

Lama das Quendas

2005-05-13T11:28:00.000+01:00

Com um nome tam atractivo, era difícil que o recital nom saira bem. Já comentei aí atrás, que um bom dia chegou um e-correio de Carme Doval, estudante do IES Lama das Quendas, para falar dos meus livros e convidar-me a um recital de poesia que os seus profes andavam a organizar dentro dumhas jornadas que levavam por título "Semana da poesia". Eu aceitei, claro. E o dia 11 estavamos em Chantada a Maria Lado, a quem também convidaram, mais este seguro servidor.

Ainda estou um pouco alucinado... O recebimento foi boíssimo. As companheiras e companheiros da Carme, e ela também claro, trabalharam sobre os poemas de nós os dous e doutros muitos poetas (Kiko Neves, Edu Estévez, Xela Arias, Lupe Gómez, grupo Rompente, Ronseltz, etc...), e, para além de ter bons conhecimentos da literatura mais recente, eram capazes de conectar com ela, de entendé-la e de fazer leituras novas, distintas, dos livros. Da mao da sua profesora de língua, Susana, figerom uns trabalhos marabilhosos com os poemas. De procurar desenhos e fotos para um poema, até auténticos trabalhos de recriaçom literária a partir dum ou mais textos, passando por apresentaçons dos textos completamente surprendentes. Um poema de Maria, por exemplo, o de Cuqui, o osinho de peluxe, aparecia colgado com pinças, e cumha foto dum osinho. Outra pessoa introduziu vários poemas meus dentro dum cucurucho de cartolina, com a legenda a arma da língua. Os poemas de Rompente apareciam escritos em guardanapos, textos de Ronseltz num rolho de papel higiénico,... o salom de actos estava cheio de estupendos trabalhos. A Mária e eu nom sabiamos para onde mirar.

O recital tivo duas partes. Na primeira hora, cara as 10'30, mais ou menos, umha hora para os mais pequenos, ainda da ESO, e depois, com um café polo meio, duas horas para o alunado de bacharelato. Nesta segunda hora, uns 130 rapazes e rapazas, ateigavam um salom no que permanecerom tranquilamente escuitando o recital. E ainda houvo um grupo de rapazas e rapazes (sobre todo rapazas), que ao rematar seguirom lá, querendo falar com nós, para que lhes dedicaramos algum livro, fazendo perguntas, opinando, etc... Penso que este foi, sem dúvida algumha, o recital mais impresionante de todos nos que tenho participado.

Antes de rematar o recital, figerom-nos entrega de alguns dos seus trabalhos, e ainda tivemos tempo para participar num jogo que nos propugerom. Entregarom-nos um envelope a cada um com um poema nosso, d'A primeira visión para Maria Lado, e de Quen nos defende a nós dos idiotas? para mim, mas recurtado verso por verso, ao estilo dadaista, para ver se eramos quem de recomponhé-lo. Por suposto, nem Maria nem eu o conseguimos, e tivemos que botar mao do texto original, mas vimos que as teorias do dadaismo tinham muito de actualidade e de utilidade.

Foi umha manham estupenda, que rematamos tomando um vinho, comendo e tomando café com umhas pessoas que ajudan a conservar a fé nessa espécie humana chamada "profesorado". A Susana e Manolo, muito obrigado. Ao alunado do Lama das Quendas, novamente o meu reconhecimento e agradecimento. Tenhem muita sorte de contar com essa profe, e a profe tem muita sorte de contar com elas/es.

Eu, e remato, aproveitei para apresentar a minha faceta de Bj (leia-se Bi-lhei), que, igual que o Dj, virá sendo quem mescla livros e cria composiçons novas. Para quê? Pois entre outras cousas para demostrar que isso dos direitos de autor e os copirrais é muito, muito, discutível. Já lhes expliquei que o seguinte poema (?), da minha (?) autoria (?), é um plágio (?) e ao mesmo tempo umha compossiçom completamente nova (?). Chegaram a pagar-me direitos de autor por aproveitar-me do trabalho que outras pessoas já realizaram?

Casa Skylab*

Quando se nega o dia a escalar o corpo dos altos edifícios
mostrando fragmentos de estrelas proibidas
onde a penas existem feridas que se esquecem
porque nos arrodean os poldros perdidos da brétema

Alta cidade tinguida pola névoa
Na cidade chove em amarelo
umha água fresca que me encelma a língua
e umha música lonxana esvaendo-se

Desde a opaca pátina do balcom pechado
no abissal fundo dos oceanos
venhem lentas as fías dos remorsos
No meio da rua
grosseira inculta e pouco delicada
em um jardin que tarde ou cedo há engolir o asfalto
memória do que queremos esquecer
ainda há algo a reclamar-nos

Som tempos de olhar a chuva
invernía no lento fluír dos almanaques
Será a emoçom quanto vale nesta terra?

De cada cidade agroma o aroma dum mistério
fronte ao mar equivocado
Como sei que ti e eu nos queremos

* O título é de Santiago Jaureguizar e os versos de: Celso Álvarez Cáccamo, Luisa Villalta, Miro Villar, Anxo Angueira, Xohana Torres, Fran Alonso, Antón Avilés de Taramancos, Xosé Luís Santos Cabanas, Yolanda Castaño, José Alberte Corral Iglesias, Ana Romani, Emma Couceiro, Lois Pereiro, Pilar Pallarés, Marta Dacosta, X. Antón L. Dobao, Eduardo Estévez, Carlos Negro, Estíbaliz Espinosa, Alberte Momán, Franck Meyer, Maria Lado.

Dias

2005-05-13T10:00:00.000+01:00

Nom tivem tempo nestes últimos dias para escrever nada, mas também nom queria, para conservar assim, como último comentário a informaçom sobre a celebraçom por parte de Fala Ceive do Dia das Letras no Berzo, que terá lugar hoje, sexta-feira, 13 de Maio.
Forom-se passando assim várias cousas da actualidade destes intensos dias, das que gostaria ter feito cá algumha mençom. Por exemplo, a reportagem publicada no Diário de Leom, no dia 8 de Maio, e da que também se fijo eco, por sorte, o Portal Galego da Língua, e na que, baixo o título de "A realidade do bilingüismo", dava por estabelecido que "Um de cada tres fala galego", referindo-se à populaçom da nossa comarca. A reportagem recolhe os dados dum estudo ("quizais o mais sério que podamos atopar", reconhecem) de Quique Costas, no que se di que no Berzo "falam de forma cotiam e como primeira língua 35.000 pessoas", dado que aparece afortalado por umha declaraçons de Xabier Lago, Secretário de Organizaçom de Fala Ceive, que explica que "um de cada três berzianos, fala galego". A reportagem tem muita informaçom e muitos dados que podem servir para muitos comentários e debates (entre eles, por exemplo, o dado de que se 35.000 pessoas ainda tenhem o galego como língua primeira, o número de berzianos e berzianos que podem reconhecer saber falar ou entender a língua galega deve achegar-se practicamente ao cem por cem, igual que no território da Comunidade Autónoma Galega; ou, por só citar outro, como é possível soster umha "infraestrutura docente do galego no Berzo", como o próprio diário lhe chama -572 alunos e alunas de língua galega, 15 centros públicos a impatir esta matéria e 7 profesores-, com só 9200 euros de gastos a maiores. Seguro que o orçamento do alcaide de Ponferrada para isso que se chama "gastos de representaçom" é maior que isso). Mas enfim, melhor que leades, aquelas e aqueles que estejades interessad@s a reportagem, da autoria de Alejandro G. Garcia.

Outro dos temas que tinha que ter aparecido por cá é a apariçom da nova revista de Fala Ceive, Berro do Leste. É umha revista modesta, singelinha, mas importante, que podes consultar integra em formato pdf, e que foi editada mercé a colaboraçom com A Mesa. A publicaçom já está a ser distribuida por diversos pontos da comarca, e hoje, nos actos que à tarde celebramos em Ponferrada, será apresentada publicamente. Nesta, como noutras muitas actividades de Fala Ceive, é justo reconhecer a colaboraçom de entidades e pessoas que colaboram na defesa, promoçom e dignificaçom da nossa língua nesta comarca arraiana, ou irredenta, mas sobre todo é justo reconhecer o trabalho de Carlos Belho, o gestor do web de FC, que tanto, e tam bom, trabalho fai.

Mais cousas que deveriam aparecer neste humilde blog de operário, desde o que prometo o fim da tirania: o acto celebrado onte, com a presença do concelheiro de cultura de Ponferrada, na Biblioteca Pública desta cidade, consistente na doaçom de livros, periódicos e revistas em língua galega, por um valor de 2500 euros.

E, com toda certeza, ficarám no esquecimento algumhas outra cousas que cá tinham que ter aparecido comentadas, mas nom quero deixar passar umha que me parece do mais importante: o apoio à manifestaçom do dia 15 em Compostela, convocada por catorze entidades, entre elas Fala Ceive, baixo a legenda "NA GALIZA VAMOS VIVER EM GALEGO".

E dito tudo isto, o comentário a seguir será sobre o fantástico recital da quarta-feira, dia 11, em Chantada, convidado polo IES "Lama das Quendas".

Dia das Letras no Berzo

2005-05-05T13:01:00.000+01:00

O 17 de Maio, Dia das Letras, Galegas, evidentemente, também se celebra no Berzo. Por certo, que esse dia, o 17 de Maio, também é o Dia Internacional das Telecomunicaçons: alguém deveria unir ambos dias, por isso da presência da nossa língua no campo das novas tecnologias... Mas isso é outro cantar, outro contar.
Hoje, falaremos do Dia das Letras no Berzo. Porque Fala Ceive celebra-o, como vem fazendo desde há anos. Nesta ocassom, os actos teram lugar o dia 13 de Maio, em Ponferrada, no local da Obra Social de Caixa Espanha, entre as 19'00 e as 21'00 horas.
O programa de actos, enviado pola coordenadora do acto, Sílvia Ribas, é o seguinte:

Homenagem à primeira revista escolar em língua galega no Berzo. "A CORUXA" publicada durante 11 anos na Escola de Corulhom. O director do centro dará umha charla explicando a história da revista. Ao finalizar fará-se-lhe entrega de umha escultura realizada polo valdeorrês Henrique Rei.

Projecçom da curta-metragem "O AVÔ" do Obradoiro de Iniciaçom à Curta-metragem integrado no projecto ON & OFF de Mr. Misto Films, projecto que percorre toda Galiza produzindo peças de curta duraçom."O AVÔ" é umha produçom de Vilar de Santos e Mr misto Films.

Crianças e Escolas que participam:
Os alunos da Escola «Garcia Yebra» de Ponferrada de infantil, com trabalhos realizados nas suas aulas.
Os alunos do «CRA Jimena Muñiz» de Corulhom, das localidades de Paradela e Parandões, representarám a obra "Eu Ghopezo no eghe. ¿E que?"
Os alunos de Corulhom cenificarám o poema "Maruxa" do autor de Vila Franca do Berzo José Bálgoma Suárez.
Os alunos do CRA de Toural dos Vaus com "A Saia da Carolina", peça tocada com gaita e cantada por eles.

Convidados que confirmárom assitência:
Poetas:
José Alberte Corral Iglesias (Crunha)
Maria Xosé Montero (Vila de Paus, Carrazedelo, Berzo)
Roi Brâs (Ourense)
Ainda (Berzo)
Igor Lugris (Berzo)
Artur Alonso Novelhe (Ourense)

Cantautores e músicos
Anxo Rei (Valdeorras)
Pepe Cañal (Berzo)
Issac Garcia (Berzo)
Grupo de gaitas (Berzo)

A seguir ao acto tomaremos um vinho e uns petiscos no Centro Galego do Berzo.
O prezo é de 3 euros e há que confirmar número de assitentes o antes possível.
Saudações

Sílvia Ribas.Coordenadora do Dia das Letras Galegas no Berzo
Tel. 600627399
Correio-e: silvinha@agal-gz.org

Eu animo a todas as pessoas que me leam, dum e doutro lado do Cebreiro, a asistir e participar nesta celebraçom do Dia das Letras no Berzo. Haverá algumhas outras actividades ao redor deste dia, das que já iremos falando, mas esta é, sem dúvida, a mais importante. Um actividade, ademais, que é possível pola colaboraçom com Fala Ceive dumhas quantas pessoas e entidades que, como FC, estam comprometidas com a defesa, promoçom e dignificaçom da língua e a cultura do Berzo, da língua e a cultura galegas do Berzo.

100 anos nom som nada

2005-05-02T00:03:00.000+01:00

Em realidade o tango fala de vinte anos, que vinte anos nom som nada... Mas cá teremos que modificar um pouco a letra, e cantar isso de que cem anos nom som nada...
Porque, e ainda que pareza increível, cem anos som os que tardou o Diario de León em assumir que na actual e oficial "provincia" de Leom existem, co-existem, em conflito, várias línguas ("El Diario de León, a punto de cumplir los cien años de existencia, saluda el nuevo año otorgando un nuevo espacio, tantas veces demandado y requerido, a las lenguas del Viejo Reino. Se trata de un pequeño, pero también importante espacio, dedicado expresamente a nuestras lenguas minorizadas, leonés y gallego del Bierzo"- O negrito é nosso).
Reparem bem no texto: reconhecem que repetidas vezes foi solicitada a atençom para as línguas em questom, e que som línguas minorizadas, nom minoritárias. Haverá que felicitar ao redactor. Tendo em conta as habituais tontarias que sobre este tema há que escuitar ou ler, agradece-se de quando em vez ver que alguem é capaz de fugir dos tópicos que soem empregar os nacionalistas espanhois.
Depois, com as indicaçons que dá para participar nesse pequeno mas importante espaço, já nom fia tam fino. Mas bom, nom se pode pedir tudo. Ninguém é perfeito: "Para ello, www.diariodeleon.es ofrece a sus lectores esta sección abierta a la colaboración de todos. Pueden enviarse textos que versen sobre cualquier tema -exceptuando la política- y que no superen los 3.000 caracteres. Las columnas pueden estar escritas en cualquier variante lingüística hablada en las comarcas leonesas, tanto asturleonés normativo como formas dialectales propias de cada una de las zonas, pasando por las hablas típicas de las comarcas del Sur y el Oriente, ese castellano “trufado” de palabras leonesas".
Primeiro fala da língua leonesa e a galega, e depois de variantes lingüísticas. Variantes de quê, exactamente? Isso nom o di. Só aclara que o asturleonés poderá ser normativo ou dialectal (sobre o galego nom se pronuncia).
Mas bom, seja como for, haverá que saudar a iniciativa. Como se soe dizer, menos dá umha pedra. Veremos, como o passo do tempo, se algumhas das colaboraçons que vaiam aparecendo passam ao papel impreso. Mas, por agora, felicitaremo-nos por que podam aparecer no web do diário. E felicitaremos, especialmente, às pessoas, colectivos e organizaçons que em todos estes anos, estiverom pedindo, contra vento e maré, desde o Berzo, um respeito e um reconhecimento para a língua e a cultura galegas desta comarca.
E como qualquer pessoa pode colaborar nesta secçom, segum o próprio jornal di, nós chamamos desde agora a participar nesse espaço e a defender, promover e dignificar a nossa língua também no Berzo. E para isso deveredes enviar as vossas colaboraçons, seguindo as indicaçons que eu colei antes, a cultura@diariodeleon.es
E é que, como no resto da Galiza, o periódico do Berzo também permite o uso do galego na sua secçom de cultura.

Visita

2005-05-01T23:47:00.000+01:00

Manha, já practicamente hoje, visitará o Berzo (onte visitou Leom), o cavaleiro da triste figura e feliz logo: Dom ZP.
Pode que venha explicar-nos isto. Como parte ainda da "provincia" leonesa, sabemos bem que a notícia é certa e a realidade assim de dura.
Também será casualidade que as duas "províncias" que apresentam piores resultados tenham sob a sua administraçom território galego.

Estupendo

2005-05-01T23:15:00.000+01:00

As cousas claras.
Eu sigo a gostar do chocolate espeso.

Gimnásia mental revolucionária

2005-05-01T21:20:00.000+01:00

Três pessoas forom detidas esta manham em Vigo, tras umha brutal carga policial realizada no remate da manifestaçom da CIG, e várias pessoas mais resultarom contusionadas, algumhas delas de especial gravidade.

Exercício de reflexom:
Dado o anterior enunciado, colha vostede os titulares de manham da imprensa "séria", quer dizer, da imprensa do sistema (já pode aceder a eles a través da rede), e compare-os com as notícias e comunicados que pode vostede ler aqui, ou aqui, aqui e aqui, ou aqui e aqui, ou aqui.
Se vostede considera mais creível, ou mais veraz, ou mais achegada à realidade, a informaçom da imprensa oficial que a dos outros meios que aparecem cá ligados, nom tenha medo: vostede nunca terá problemas com as forças e corpos de seguridade do Estado.
Mas lembre, a ser possível antes de durmir, aqueles versos do Bertolt Brecht: "Primeiro fôrom polos comunistas...". Que vostede descanse mal esta noite!

Campo da Água

2005-04-29T11:44:00.000+01:00

Já temos falado em várias ocasons neste blog da deixadez com a que actuam as administraçons provinciais (de Leom), e autonómica (de Castela e Leom), com respeito ao Berzo. Certamente, é complicado explicar como é que nom existe mais reacçom anti-leonesa nesta nossa comarca se nom temos em conta a desinformaçom com a que essas administraçons agacham a sua nefasta actuaçom, e o rol de dique de contençom e estruturas de adormecemento que desempenham os partidos, sindicatos e outras organizaçons e instituiçons espanholistas.

Polo Diario de León de hoje, conhecemos que a Junta de Castela e Leom (já vos podedes imaginar que a sua denominaçom oficial é, única e exclussivamente, em castelam), tem deixado caducar a declaraçom de Conjunto Histórico das palhoças do Campo da Água, exemplo de arquitectura tradicional dos Áncares, no termo municipal de Vila Franca do Berzo.
Para retomar o expediente, é preciso que se passem três anos para que a mesma administraçom poda reabri-lo. Neste caso, tendo em conta que o praço expirou no Agosto passado, haverá que aguardar mais de dous anos para ver se entom a administraçom autonómica sim tem vontade de fazê-lo. Mas visto quais som os precedentes, é de imaginar que novamente será adiado.

Quê mais lhe tem a uns quantos burócratas de Valhadolid ou de Leom, que nem tam sequera sabem situar muito bem no mapa o Berzo, e muito menos Vila Franca, o desenvolvimento da comarca e a protecçom do seu património histórico? Que se pode aguardar de quem só se preocupa do Berzo para saber que pode incluir nas fotografias das campanhas publicitárias de turismo umha "zona verde"? Porque isso é o que realmente é para a Junta de Castela e Leom o Berzo: umha indefinida e abandonada zona verde, no recuncho noroeste.

Se queredes escrever-lhe ao Presidente da Junta de Castela e Leom, para perguntar-lhe por este tema, ou por algum outro, como a defesa e promoçom, real, da língua e cultura galegas nas comarcas do Berzo e a Seabra por parte da administraçom autonómica, podede-lo fazer aqui. Com a surpresa de que o podedes fazer no nosso idioma, o idioma de toda a naçom galega, desde Fisterra ao Maçanal (ainda que ele nom o saiba).

Como ir a Irlanda

2005-04-27T10:01:00.000+01:00

O Diario del Bierzo, que lamentavelmente nom publica absolutamente nada de nada em galego, nem tam sequera a secçom de cultura como fam os meios de comunicaçom da Comunidade Autónoma Galega, publica a notícia de que um grupo de alunas e alunos berzianos de três liceus (Bergidum Flavium, de Cacabelos, Padre Sarmiento, de Vila Franca, e Europa, de Ponferrada) nos que cursam a materia de Ciencias Socias em língua galega, visitarom a vila de Ponte Vedra, onde, entre outras actividades, forom recebid@s polo seu alcaide, Fernándes Lores.

O bom do Diário do Berzo, é que é um diário que permite comentar as notícias. Em casos assim, sempre há comentários mais interesantes e mais afortunados que outros. Sempre há quem vomita lá a sua falta de educaçom, e quem comenta tranquilamente a notícia ou refere-se a questons que guardam relaçom com esta. Quando publica notícias que tratam da língua galega e o Berzo, sempre aparecem aqueles recalcitrantes e obtusos que aproveitam para desafogar a sua mediocridade.
Neste caso, a dia de hoje aparece um só comentário, que pretende mofar-se desta actividade dos liceus referidos, e refere-se ao tema com umha frase final que di, por suposto em espanhol: "Irse a Galicia va a ser como irse a Irlanda".
Pois... vai ser que nom!. Ir a Ponte Vedra nom vai ser como ir a Irlanda. Em primeiro lugar porque nom supom visitar outra naçom (Ponte Vedra e o Berzo fam parte da mesma naçom, Galiza), e em segundo lugar porque nom supom ir aprender outro idioma (Ponte Vedra e o Berzo tenhem um idioma comum, sim: o galego).

O Berzo precisava mais actividades como esta. Mais intercámbios entre escolas e liceus, e também entre organizaçons e instituiçons culturais, educativas, sociais,... E também políticas.
Como em Irlanda, como em Irlanda...

As três Xacias

2005-04-27T08:41:00.000+01:00

No passado dia 8 de Abril, recebia um correio electrónico dumha rapaza de Chantada, Carme Doval, perguntado-me, entre outras cousas, pola possibilidade de conseguir um exemplar do "Quen nos defende a nós dos idiotas" (Letras de Cal, 1997). Depois de um intercámbio de dous ou três correios, chegou-me mais tarde, o 19 de Abril, um convite dumha das suas profesoras, Susana, para participar no seu liceu num recital de poesia na primeira semana de Maio.
Portanto, na próxima semana estarei por Chantada, conhecendo as autoras que estam por tras do blog As tres Xacias, e também os seus companheiros e companheiras do Recuncho dos Venres e Pendellos, e as profesoras e profesores que som capaces de animar ao seu alunado para que escreva e fale na língua do país. Isso fai recobrar esperanças e sentir-se ainda orgulhoso de, quando menos, alguns profes.

Por ali andarei, recitando alguns poemas, antigos, e aproveitando para sacar de paseio os novos.

Novos como este:

"Qualquer pessoa pode escrever como Manolo Rivas
Ou como Suso de Toro
Eu próprio som capaz de escrever como Ferrim
ou como Manuel Maria"
explicava Chema ao público
em aquela charla-colóquio na biblioteca municipal da Veiga
Tinha publicados três livros de poesia
e um romance
Mas a sua profissom era a de camionista
O seu verdadeiro orgulho era aquele trailer
de 15 toneladas
"O dificil é escrever coma mim"
continuava a dizer
"colhendo o bolígrafo com a esquerda
o caderno em riba do volante
e circulando
a cem por hora
por essas autoestradas alemás do demo"

Um "crack"

2005-04-19T13:20:00.000+01:00

De nom ser porque conheço pessoalmente ao Jaureguizar, pensaria que a sua existência nom é real, que nom é mais que um invento da equipa informática responsável do Portal Galego da Língua, mantido na rede pola Associaçom Galega da Língua (AGAL).
Mas o certo é que o Jaureguizar existe, e nom é um invento do Miguel R. Penas e demais responsáveis do PGL para animar o seu portal e batir record de visitas e comentários: no momento de escrever este post, umha notícia enviada polo próprio Jaureguizar, sobre umha charla sua em Braga, leva 1010 visitas (!!!), e nada menos que 111 comentários!!!. Colosal.
Este homem é um crack. Já nos tem acostumados a ver como o seu bar se enche de gente que quer opinar sobre os temas dos que ele fala tras da barra. Mas agora, já nem necessita estar presente: enche outros bares só com anunciar a sua visita. Se contamos os comentários do PGL e os do seu negócio, a respeito do mesmo tema, já é de livro Guinnes. E se acrescentamos as cousas que se estam a dizer no foro electrónico da Assembleia da Língua, a cousa já nom tem possibilidade de ser medida...

Mas finalmente, todo é bem pouca cousa. Resulta que todo começa porque umhas quantas pessoas consideram negativo que o Jaure vaia dar umha charla a Braga, porque é um defensor do galego isolacionista. Mas se simplesmente fora assim, nom haveria polémica. De ser o autor da Casa Skylab um simples isolacionista, ou um isolacionista furibundo e convencido, nada disto teria passado, até porque nom teria ele enviado umha notícia ao PGL falando dumha charla sua em Portugal. Nom estamos a falar dum Alonso Montero, p.e., que imagino terá ido mais dumha vez dar charlas a Portugal: a ele nom se lhe ocorreria enviar umha comunicaçom ao PGL sobre o tema, e ao PGL nom se lhe ocorreria recolher tal "notícia".
O Jaureguizar é isolacionista. Sim. Mas também é nom anti-reintegracionista. Quer dizer: nom é anti-reintegracionista. E as pessoas que o conhecemos sabemo-lo. Por isso, imagino, o PGL recolhe a notícia de ele ir dar umha charla a Braga, por isso algumhas pessoas reaccionam contra os comentários críticos contra o Jaureguizar por ir dar essa charla, por isso, penso eu, o Presidente da AGAL, nestes mesmos días, decide dedicar-lhe um texto que aparece no PGL (e que também vai caminho de batir records, e nom polo que di o texto, mas pola dedicatória).
Algumhas pessoas, reintegracionistas, dentro do amplo, plural e variado espectro que tal denominaçom recolhe, pensarám que é negativo que um isolacionista nom anti-reintegracionista participe numha charla em Portugal. É a sua opiniom. Eu opino o contrário. Sei, tenho a completa seguridade, de que o Jaureguizar nom terá dito barbaridades sobre o reintegracionismo na sua charla em Braga. Terá dado a sua opiniom, evidentemente, que nom coincide com a minha, p.e., ou com a de muitas outras pessoas reintegracionistas. Mas nom terá mentido, nom terá insultado, nom terá denigrado.

Algumha vez ele escreveu no seu blog que nesta questom do reintegracionismo ele nom era practicante, mas si creente. Menos dá umha pedra. Tal vez algum dia se faga practicante. Nom penso que por isso tenhamos que excomungá-lo.
Penso eu.

Conselho Comarcal / Consejo Comarcal

2005-04-15T12:55:00.000+01:00

O Conselho Comarcal do Berzo (oficialmente denominado, única e exclusivamente em espanhol), tem aprovado duas resoluçons em prol da língua galega, em 17 de Maio de 2001 e em Maio de 2004. Agora, Fala Ceive pide publicamente que essas declaraçons de intençons se traduzam em factos, e solicita do Conselho Comarcal que a sua renovada web se renove ainda mais para convertir-se num web bilíngüe, igual que a comarca.
Vermos qual é a resposta do Conselho Comarcal e do seu Presidente, ou se todo eram nada mais que palavras, palavras e palavras.

Desde o Eu-Návia

2005-04-15T12:43:00.000+01:00

Em referência ao meu comentário sobre a retirada proposta do PSOE de Galiza no Parlamentinho, chega-me informaçom do Carlos Varela Aenlle, natural da comarca do Eu-Návia e membro da "Real Academia Galega", sobre as suas declaraçons à imprensa, na que explica que o único erro da proposta do PSOE era "que nom se pode ensinar galego a umha das comarcas que melhor o falam", e critica aos alcaides psoecialistas de aqueles territórios baixo administraçom asturiana por nom fazer nengumha mençom à transculturizaçom desse comarca nem ao processo de espanholizaçom.
Bem se ve que algumha cousa está, ainda, viva na Galiza irredenta onde mais difícil é manter a chama da língua.

Pre-campanha (I)

2005-04-14T12:51:00.000+01:00

Procuro no e-Estraviz, e atopo:

Fraga s. f. (1) Bosque de árvores, de diferentes classes, plantadas ou nadas espontaneamente. (2) Lugar cheio de penedos e rochas. (3) Rocha escarpada. Penedo, penhasco. (4) Espécie de silva. (5) Matorral que serve de abrigo por romper nele a força do vento. (6) Terreno muito fundo entre montes abruptos. (7) Xisto piçarroso descarnado num monte. Sinóns. Fragaria, banhola, vaganta, ribanceira, alcantil, penha, penhasco [lat. fraga].

Quintana s. f. (1) Casa campesina com horta e dependências. (2) Adro que está diante da porta de uma igreja e serviu em muitos sítios de cemitério [lat. quintana].

Nom aparece Tourinho, mas entom, para demostrar que os reintegracionistas nem sempre som os que andam a dizer cousas raras, vou ao Gran Diccionario Xerais da Lingua (ainda pola antiga normativa ILG, reparem no diccionario com dous c). Consulto a 1ª ediçom, de Decembro de 2000, segum a 1ª re-impressom, de Fevereiro de 2001, e di:

Tourinho: persoa imbécil ou idiota.

E isto dá-lhe um novo significado, radicalmente distinto, à palavra de orde "Tourinho Presidente".

Conclusons:
1.- Estraviz e os amigos da AGAL devem completar o seu dicionário electrónico.
2.- O PSdG-PSOE terá que ter cuidado com que a gente visite os dicionários durante a campanha, e pre-campanha, eleitoral.

O PSOE, Fraga, a Galiza e a nossa língua

2005-04-13T13:09:00.000+01:00

O PSOE (autodenominado PSdG-PSOE na Galiza administrativa) nom defende o galego nem dentro nem fora da CAG.
Inteiro-me polo foro de debate do web de Fala Ceive, que o PSOE retirou a sua proposta nom de lei, da que falava eu há uns dias, que apresentara no Parlamentinho do Hórreo, para a defesa e promoçom da língua e a cultura galegas fora do território da actual Comunidade Autónoma Galega, quer dizer, nos territórios do Eu-Návia, O Berzo, A Seabra e o Val de Elhas.
O comentário aparecido no web de Fala Ceive recolhe a notícia oferecida polo diário asturiano "La Nueva España" (só o nome, já mete medo), no que vários alcaides psoecialistas da comarca do Eu-Návia (baixo administraçom asturiana), se felicitam por tal retirada, pois consideravam a proposta da secçom galega do PSOE como umha ingerência, umha provocaçom, etc., etc., etc.
Agora, frotam as maos todos aqueles a quem a defesa e a promoçom do galego (ou do galego-português), e do asturiano (ou do astur-llionés), lhes importa um caralho, porque o único que lhes preocupa é a preponderáncia do espanhol. E, por se fora pouco, os de Andecha Astur, fam-lhe os coros, pensando que a má saude da nossa língua é inversamente proporcional à boa saude do asturiano, quando o certo é que os únicos que saim beneficiados som os espanholistas.
Hoje mesmo aparecem nesse mesmo meio umhas declaraçons de Fraga, insistindo em que nunca houvo nem há actualmente ingerência de nengum tipo, e desvelando, e isso sim que deveria ser umha notícia dentro da Comunidade Autónoma Galega, que "hace tiempo que hay un acuerdo con Asturias de no trabajar en ese asunto, y se está cumpliendo".
Que significa isso? Que o Governo galego nom cumpre, premeditadamente, as suas obrigas de defesa e promoçom da língua galega mais alá dos limites da CAG? Nom vai haver nengum pronunciamento da Academia Galega? Do ILG? E por parte doutras entidades? Ou é que a precampanha eleitoral obriga a nom entrar em terreos fora do considerado eleitoralmente transcendente?

Olhar para outro lado

2005-04-11T11:48:00.000+01:00

Publico no último número do Abrente (vozeiro trimestral de Primeira Linha), um artigo sobre o Berzo e a sua situaçom política desde umha óptica galega, independentista e de esquerdas, que agora reproduzo cá.

A soluçom nom é olhar para outro lado

Nas comarcas galegas da faixa oriental, o Berzo e a Cabreira, oficialmente em território da província de Leom, a Seabra também oficialmente na província de Samora (ambas as duas províncias da Comunidade Autónoma de Castela e Leom), e no Eu-Návia (nas Astúrias), estamos a sofrer as conseqüências da falta de decisom, valentia e coragem por parte do conjunto do nacionalismo galego (incluído o independentismo) nos últimos, como minimo, 30 anos.

Se bem praticamente todas as organizaçons do nacionalismo no período assinalado (e algumhas mesmo desde antes, como é o caso do periódico galego A Fouce, editado na Argentina pola Sociedade Nacionalista Pondal), recolhiam ou recolhem umha defesa, mais ou memos morna, mais ou menos decidida, segundo os casos, da galeguidade destas terras, ou de algumha delas, o certo é que desde o ano 1975 até a actualidade nom tem havido umha acçom política real nesse sentido.

Como resultado dessa inaniçom, hoje em dia as comarcas orientais, aquele território que historicamente deu em ser chamado a Galiza irredenta, conhece um forte e acelerado processo de perda de identidade lingüística, cultural e política, ao tempo que avança sem praticamente achar resistência umha identidade espanhola que pretende negar qualquer possibilidade de que estas comarcas conheçam e/ou recuperem a sua memória, a sua história e a sua identidade. Este processo, vive-se dumha maneira muito mais virulenta no território do Eu-Návia, onde os sectores mais reaccionários e antigalegos do nacionalismo e da esquerda nacionalista asturiana, gasta mais esforços em combater a galeguidade daquelas terras do que o próprio espanholismo que tenhem dentro do seu território.

Hoje em dia, tam só NÓS-Unidade Popular mantém umha estrutura, fraca, mais real, em algumha destas comarcas, visando construir também no Berzo, tal como no conjunto da naçom, a esquerda independentista que Galiza e o seu povo trabalhador precisam. Mas o trabalho político da esquerda independentista no Berzo desenvolve-se numha situaçom muito distinta à existente dentro da Comunidade Autónoma Galega.

Em primeiro lugar, porque os sectores políticos, sociais, sindicais, juvenis, com os que NÓS-UP mantém relaçons ou colabora, nom existem no Berzo. Nom existe nengumha organizaçom (plataforma, grupo político, organizaçom social, sindical, juvenil, etc.), que seja quem de dar forma e de acumular forças no caminho de converter o Berzo numha comarca com capacidade para se autogovernar e decidir livremente o seu futuro dumha óptica de esquerdas.

Assumir realmente a questom berziana (e o mesmo pode ser dito das demais comarcas arraianas), supom denunciar e rejeitar a actual divisom político-administrativa emanada da Restauraçom Borbónica, e abrir o que para os grandes partidos de obediência espanhola é a Caixa de Pandora da reorganizaçom territorial. Nengumhas das organizaçons de obediência estatal, sejam partidos, sindicatos ou organizaçons juvenis, vam poder avançar nesse sentido.

É dos sectores progressistas, de esquerda, alternativos e revolucionários de onde tem de vir a resposta. E aí deve estar presente a esquerda independentista galega, dinamizando estruturas que possibilitem a confluência desses sectores, trabalhando com eles, criando espaços comuns.

E para isso nom pode aplicar-se a mesma recita que o nacionalismo e o independentismo galego vem aplicando nas últimas décadas: resolver o problema da Galiza irredenta a olhar para outro lado.

Aniversário

2005-04-07T13:58:00.000+01:00

Onte estivem de aniversário. Dediquei-me este poema.

Olho para as leitugas
enquanto boto água nas fendas da memória
e co sacho golpeio docemente
cada umha das palavras que rodeiam esta casa
"Parabéns"
berram os gatos todos os gatos do mundo
enquanto sigo a cair polo precipício
e oito galinhas cantam
a coro
a melodia das casas habitadas

Um cam dorme diante da porta
aberta

Lentamente
esqueço as horas
os minutos os segundos
até chegar a esta pequena sensaçom de calor
Talvez todo seja arrastar palavras
dum lado para outro
sem cessar
até que alguém escuite
e entom ficar em silêncio
Para sempre

Fanny e Alexander

2005-04-07T13:05:00.000+01:00

Fanny e Alexander, música avançada, dim, desde Compostela para o mundo, fazendo umha pequena parada no Proyecto Demo, de Rádio 3, o festival musical esse de Benicassim que leva o nome dumha marca de cerveja (da que gosto mais bem pouco), e ainda algumhas outras entidades.
Cá, unindo-me à campanha blogueira em rede, podedes votar por eles. E cá, fazede-o primeiro, podedes escoitar três temas. N'A Regueifa informam: Para o concurso apresentaron un tema en inglés -Tree to hide- e dous en galego -Tebras entre as mans e Hora da morte, este último sobre un poema de Darío Xohan Cabana-.
Fanny e Alexander som Maria Efigenia Arias Baltar e Noel Feáns Garcia. Ele, penso, tem família polo Berzo, assim que, finalmente, todo fica na casa. Que mundo mais pequeno! Com ele compartilhei várias tardes de segunda-feira de reunions, lá em Compostela. A ver se triunfam, e se fam famosos, e aquele cd da Fusquenlha se convirte numha autêntica joia de coleccionista.
Avante!

Um prémio por nom publicar em galego?

2005-04-06T11:51:00.000+01:00

O Diario de León, do grupo Voz, recebeu onte em Lugo um dos Prémios "nacionais" (espanhois) que concede o Ministério de Cultura do Estado (espanhol também, of course), da mao da ministra Carmen Calvo. Parece ser que o prémio se lhe concedia ao suplemento literário "El Filandon", pola sua labor de apoio ao livro e à leitura.
Nom está de mais lembrar, que este periódico, ao igual que practicamente todos os meios de comunicaçom do Berzo (imprensa, rádio, televissom e meios electrónicos), negam-se a publicar textos ou artigos ou a recolher declaraçons feitas em galego, língua do Berzo.
E onte, um representante de dito periódico, pertencente ao mencionado grupo, foi recolher a Lugo um prémio relacionado com a cultura e essas cousas. E, como já sabedes, outras vezes o que recolhem som os fundos da Conselharia de turno por fomento da língua galega e essas caralhadas.

Quero a minha parte do canon

2005-04-06T11:39:00.000+01:00

Já sei o que figestes no último Fevereiro.
Quero a minha parte.

Vai ser que nom

2005-04-02T13:15:00.000+01:00

Em fim... por agora vai ser que nom.

Já sabedes que onte foi 1 de Abril, e esta foi a minha pequena contribuiçom à recuperaçom e promoçom dumha das nossas tradiçons: o dia nom que é melhor nom crer nada do que che contem, ou che escrevam.
Mas nunca se sabe...

Saude.

Reunificaçom

2005-04-01T10:26:00.000+01:00

Hoje 1 de Abril, espertei-me escuitando na rádio do meu despertador que umha comissom de trabalho do Conselho Comarcal do Berzo, está a preparar um informe que será apresentado no plenário desse organismo para a sua aprovaçom, no que aposta pola segragaçom da Comunidade Autónoma de Castela e Leom e a imediata reunificaçom com a Comunidade Autónoma Galega, como resposta aos graves problemas da comarca e ante a completa falta de atençom por parte da Junta de Castela e Leom. A notícia, umha exclussiva, falava de que o informe, ainda confidencial, está a ser elaborado por três membros do Conselho Comarcal, entre eles, presumivelmente, o seu Presidente.
Permanezo atento às rádios, a ver quais som as reacçons que se produzem. Em quanto tenha mais informaçom, colarei-na no blog. Também convem permanecer atentos às possíveis reacçons por parte da Junta de Galiza.

Que dura é a vida d@s galeg@s!

2005-03-30T21:59:00.000+01:00

Agora que já quase tinhamos demostrado que Cristobal Colom era galego, e em concreto de Ponte Vedra, vai alguem e começa a dizer que o Mestre Mateu era de Leom.
Assim nom há quem levante mitos nacionais, caráfio! Nom pode ser que quando já estamos a piques de ler nos livros de história dos colégios que Pedro Madruga e Cristobal Colom eram a mesma pessoa, venha alguem a fastidiar-nos deste modo. O máximo que devemos estar dispostos a admitir, é que o Mestre Mateu era do Berzo. E, por isso mesmo, galego.

O PSOE defende o galego fora da CAG. E dentro?

2005-03-29T13:35:00.000+01:00

O do PSOE e a sua secçom galega (que na CAG adopta o nome de PSdG-PSOE) é para fazer um guiom de umha telesérie dessas de humor de meia tarde.
O mesmo PSOE que ataca a língua por boca de Pacu Vázquez, agora defende por boca de Natividad González Laso, do Ferrol, Laura Seara Sobrado, de Alhariz, e Manuel Luís Rodríguez González, d'A Peroxa, a necessidade de defender a língua galega mais alá das fronteiras da actual CAG, quer dizer, no Eu-Návia, no Berzo, na Seabra e no Val de Elhas, por meio dumha Proposiçom nom de Lei, apresentada no parlamentinho do Hórreo.
Cousas veredes! Estupendo que o PSOE se preocupe pola língua nos territórios da Galiza irredenta. Agora, também será necessário que se preocupe pola nossa língua na Corunha, por exemplo, apresentando umha proposiçom nom de lei onde inste à Xunta a defender, com todos os meios ao seu alcance, a língua também nesta cidade.

A barbaridade mais alta de Castela e Leom...

2005-03-28T12:17:00.000+01:00

... e justo a vam ter que fazer no Berzo!

NÓS-Unidade Popular já denunciara no seu momento a construçom dum edifício de quase cem metros, repartidos em 28 andares, que se vai construir em Ponferrada, na zona de recente urbanizaçom chamada A Rosaleda. Foi a única organizaçom de toda a comarca do Berzo que mostrou a sua disconformidade, e definiu a sua construçom como umha "aberraçom urbanística".

Tanto o Concelho, por boca do seu alcalde, López Riesco, como diversas "forças vivas" da comarca, estam fortemente implicados em este absurda, paleta e estúpida construçom, que desde logo modificará, mas para mal, Ponferrada, e conjunto da comarca, no ecológico, no paisagistico, no visual, etc...

O projecto sigue adiante, e polas notícias que aparecem habitualmente nos meios de comunicaçom, parece ser que muitas das vivendas já estam vendidas. A chamada "Torre da Rosaleda", será dumha altura similar à Torre Windsor, recentemente desaparecida (ainda nom de todo) em Madrid; ou dumha altura similar à Torre Costa Rica, popularmente conhecida como Ercon, no centro da Corunha.

O certo é que quando escoitamos a um político destes falar em termos de "un impulso de modernidad para Ponferrada", há que temer sempre o pior. Mas o pior de todo, é ver que nom existe nengumha reacçom por parte das organizaçons sociais, políticas, sindicais, culturais, de defesa e protecçom do meio ambiente, etc... ante umha dessas barbaridades que se convertiram no exemplo do que nunca jamais deveria estar permitido.

Com certeza, seguiremos a falar desta barbaridade em próximos posts.

Matar judeus

2005-03-23T13:16:00.000Z

As faculdades de lingüística e as de antropologia deveriam estar-se rifando o Berzo para analisar a expressom que dá título a este post: matar judeus.

Nestas datas, é habitual escuitar à gente, nova e velha, por Ponferrada e outros lugares do Berzo, dizendo-se: "Quê? Imos matar uns judeus?". E nom é que umha irracional febre anti-sionista sacuda esta comarca arraiana. Nom.
Nas férias de primavera, que som estas datas que os integristas católicos chamam (e conseguirom impor oficialmente) S.S. (Semana Santa), é costume no Berzo ir tomar limonadas aos bares. Em vez de ir tomar os habituais vinhos ou cervejas, vai-se de limonadas.
Todos os bares, cafetarias, restaurantes, pubs, ... tenhem na sua porta um cartaz anunciando: "Temos limonada". Nom há estabelecimento de hostelaria que nom disponha de limonada nestes dias. E a ir tomar limonadas, de bar em bar, provando as dos diferentes bares, todas elas distintas, muitas delas caseiras, ou feitas nas cooperativas de vinho, chama-se-lhe "ir matar judeus". O motivo? Nem ideia. Aí deveriam entrar as faculdades e os estudosos. Eu, nom fago mais que contribuir a que nom se perda a tradiçom, e, por suposto, tomo as limonadas, quer dizer, mato judeus. De bar em bar, como deve ser.

Mas haverá quem se pense que isto das limonadas é umha bebida a base de zume de limom, e estará errado ou errada. As limonadas nom som outra cousa que sangria: vinho com fruitas, posto a macerar durante como mínimo quinze ou vinte días. E, com isto da moda de investir em I+D e da modernidade, que todo o modifica, (já sabedes: o tema clássico da tradiçom e a modernidade), agora há muitos bares que, ademais das fruitas (maçá, naranja, peras, fresas, etc..., cada receita é distinta), também acrescentam álcol à bebida: martini, genevra,...

Finalmente, o de matar judeus, é umha boa diversom, mas levanta umhas dores de cabeça... Eu, sempre aproveito para brindar por umha Palestina livre.

O mar polos olhos

2005-03-21T16:10:00.000Z

O amigo, companheiro e camarada Ramiro envia a informaçom sobre a apresentaçom do livro de Alícia Fernández "Botar o mar polos ollos", o dia 2 de Abril na Corunha. Reproduzo cá o correio enviado, e aproveito para animar às pessoas que podam a acudir a este novo acto d'O Tangaranho Vermelho, e a visitar esse interesante blog.

Alicia Fernández apresenta o seu poemário na Corunha o 2 de Abril

Alicia Fernández, a jovem poeta do Savinhao que já está a ser considerada como umha das últimas grandes revelaçons da poesia galega, apresentará o dia 2 de Abril às 8 da tarde no Centro Social A Treu (Rua Sam José, 2 - A Corunha) o seu poemário "Botar o mar polos ollos", recentemente publicado pola editora portuguesa "Tema". Neste acto organizado por O Tangaranho Vermelho, intervirám Yolanda Castaño, Ramiro Vidal e a própria Alicia Fernández.

Ramiro Vidal Alvarinho
www.tangaranhovermelho.blogspot.com

Contaminaçom

2005-03-19T11:02:00.000Z

Em Outubro de 2004, o Diario de León informava sobre as indústrias mais contaminantes da Uniom Europeia radicadas na "província" leonesa. Segum aquela informaçom, que nom foi desmentida, de entre todas as indústrias europeias que merecem o apelativo de "mais contaminantes", em total umhas 9.025 no conjunto da Uniom Europeia, 12 delas estam no território que a dia de hoje se define oficialmente como província de Leom, e, reparem no dado, 5 delas no Berzo, quase todas nos arredores de Ponferrada, ou mesmo em Ponferrada. As centrais térmicas de Anlhares do Sil, de Uniom Fenosa, e Cubilhos do Sil, de Endesa; a cementeira Cosmos em Toral dos Vaos, da Cimpor; a acereira Roldam, filial de Acerinox, em Ponferrada; e o próprio vertedoiro de lijo de Ponferrada.
Quer isto dizer que estas empresas tenhem superado todos os limites de emisom de gases, líquidos e sólidos nocivos e contaminantes estabelecidos polas próprias autoridades, capitalistas, europeias, estatais e da comunidade autónoma à que, ainda a dia de hoje, oficialmente pertence o Berzo.
Esta situaçom, já foi denunciada em repetidas ocasións por diversas entidades, tanto políticas (entre elas, NÓS-UP) como ecologistas e de protecçom do meio ambiente (como por exemplo, Ecologistas em acçom).

Território autónomo

2005-03-18T16:27:00.000Z

Traio hoje cá um artigo de Xabier Lago, fundador da Associaçom Cultural Fala Ceive do Berzo, e actual Secretário da mesma, aparecido no meio electrónico Diario del Bierzo. X. Lago é um convencido galeguista, palavra que nos territórios da Galiza irredenta recupera todo o seu significado, mas que, como sucede habitualmente no Berzo, e como Fala Ceive tem denunciado publicamente, ve-se na obriga de escrever artigos e notas de imprensa para os meios de comunicaçom em espanhol pola negativa de estes a publicá-los em galego.
O artigo leva por título "Por el territorio autónomo de El Bierzo", e trata, com claridade, o tema da reordenaçom e/ou reorganizaçom territorial nesta Comunidade Autónoma incomprensível chamada Castilla y León. Nom é necessário compartilhar o cem por cem das palavras e ideias do autor para entender que é umha interesante, e necessária, aportaçom. E com muito valor, tendo em conta a falta de valentia e coragem que tenhem outras pessoas, a um lado e outro do Padornelo, para falar deste tema.

Tam psiquátrico

2005-03-15T16:20:00.000Z

Confundim-me
ou enganárom-me
Eu queria solicitar um dos postos de músico
Acordeom
guitarra
ou bateria
Tanto me tinha um como outro
Eu nom tenho nem ideia de música
e penso que só umha vez vim um acordeom a menos de 100 metros
Mas pensei que isso teria possibilidades
Possibilidades de fugir
digo
Estar aí
com o acordeom com a guitarra com a bateria
sem chamar a atençom
e em qualquer momento
zás!
Fugir
Escapar
Evadir-me
isso é
Exactamente isso
Evadir-me
Eu escuitara em algum lado que a vida do músico
polo geral
é daquela maneira
já se sabe
mais relaxada
menos rígida
sem tanta vigiláncia e controlo
e pensei que numha dessas
entre notas partituras e semicolcheias
que eu nom sabia nem o que eram
e continuo sem saber
numha dessas
aproveitava eu
e...
A evasom
A escapada
A fugida
Eu por isso queria solicitar um dos postos de músico
Saber
o que se di saber
de música nom sei grande cousa
Mas nom som parvo
e podia aprender
Também aprendim a manejar a vassoira
a esfregar as janelas do quarto andar
que só abrem para fora e ninguém se atrevia
e a levar a roupa à lavandaria
que som o único de toda a minha secçom
a quem lhe deixam levar a roupa à lavandaria
Também podia aprender algo de música
E por isso fum pedir os papéis para solicitar um posto
Mas confundírom-me
ou enganei-me
e preenchim os papéis para o posto de operário jardineiro

E cá estou
sem poder sair destes muros
tam cinzentos
arrancando as ervas más que medram
tam verdes
nos jardins deste centro
tam psiquiátrico

(d'O livro das confusons)

Eu também...

2005-03-14T13:45:00.000Z

Eu também quereria ser luz
quereria ser metal no fundo do mar
eu também
Ser esse pequeno ruído que nos acorda
essa insignificante onda acústica
que nos fai volver a cabeça
ou aquel momento exacto
onde escolhemos
onde dizemos
onde fazemos aquilo que sabemos
Eu também quereria ser luz
Como essa luz que te ilumina
essa luz que caminha contigo
que tu deixas caminhar contigo
ou que tu nem tam sequer sabes que caminha contigo
Ser esse metal que do fundo do mar
nos fai pensar
ou nos fai sonhar
ou nos fai viajar
ou te ilumina quando apareces andando no extremo de umha rua
ou no recanto de umha praça

E nom esta distáncia
esta terrível sensaçom de estar fora
de nom ser
de nunca jamais fazer parte
Esta obscura negaçom da possibilidade
que se estende vertiginosamente
oferecendo só o caminho da fugida e a derrota

(d'O livro das confusons)

A maldiçom de Gilgamesh

2005-03-10T13:04:00.000Z

Nuvens

Chovem chapeus
cairom enriba dos pobres.

Chove trigo
caiu enriba dos famintos da África

Chove vinho
caiu no Norte da Europa

Chove dátiles
cairom no deserto

Chove balas
cairom enriba da nossas cabeças

Raad Zamil ( Nascido em Misan em 1970. Entre os seus poemários A minha relaçom com Beethoven, de 1999).

Na passada quinta-feira à tarde, em vez de ir à escola, como deveria, decidim ir à apresentaçom em Ponferrada do documental Semente ("Semillas"), editado conjuntamente, no CD-DVD "Recuperando Memória", pola Associaçom para a Recuperaçom da Memória Histórica (ARMH), a "Fundación Contaminame", e o concelho madrilenho de Rivas-Vaciamadrid.
O CD-DVD recolhe o concerto que o 25 de Junho de 2004 se celebrou em Rivas-Vaciamadrid em homenagem "aos republicanos e republicanas que sofrerom a Guerra Civil espanhola e a ditadura franquista". Junto com esse concerto, onde aparecem nomes como Bebe, Javier Alvarez, Jose A. Labordeta, Luis E. Aute, Luis Pastor, Lluís Llach, Paco Ibáñez, Pedro Guerra, Ruper Ordorika, Angel González, Juan Diego, Luis García Montero, Pilar Bardem, Rosa Regás, Manuel Rivas, e outros e outras muitas, inclue-se um documental onde falam alguns e algumhas das republicanas homenageadas, recolhendo o seu deslocamento desde a sua residência actual até Madrid para assistir a essa homenagem. Umha boa parte das pessoas entrevistadas, som do Berzo: velhos republicanos e republicanas, ou filhos e até netos deles: alguns desaparecidos, outros exhumados nos últimos anos.
O público assistente, umhas cento e cinqüenta pessoas, dumha meia de idade surprendentemente alta, escuitarom atentamente as palavras de apresentaçom de Santiago Macias, e logo virom com emoçom as imagens de aquel acto, lembrando muitos deles a sua viagem a Madrid e a alguns companheiros já dessaparecidos neste último ano.
Mas antes de ir a este acto, e como ainda era cedo, dim-me umha volta por Siena, onde tivem a sorte de ver, e comprar, um interesante livro, de onde tirei o título e o poema que abrem este post: "La maldición de Gilgamesh. Antologia de la poesía iraquí contemporánea".
Este volume, de Ediciones la tempestad, recolhe mais de trinta poemas do melhor da poesia iraquiana dos últimos anos, ao dizer dos antologistas: Abdul Hadi Saadoun, nascido em Bagdad 1968, residente em Madrid, poeta, narrador, guionista de cinema, e director da única revista cultural em árabe do estado espanhol, Alwah; e Josep Ramon Gregori i Muñoz, nascido em Valéncia em 1970, licenciado em Filologia Catalá, Titulado superior em língua árabe pola Escola Oficial de Idiomas de Valéncia, tradutor de diversas obras do árabe para o catalam e para o espanhol, e actualmente professor de língua catalá para alunado que provem de línguas nom-románicas no Vallès Ocidental.
Nomes para nós, quando menos para mim, desconhecidos: Shirku Peque, Fadhil Al-Azzawy, Yan Demu, Fai Hussein, Mehdi M. Ali, etc..., que nos mostram um país desde os seus versos. Um país, desgraciadamente, tam de actualidade pola invassom imperialista ianqui, e pola heroica resistência do seu povo. [Nem sei se será um livro fácil de atopar nas livrarias. Para quem tenha interese nel, dou cá os dados para andar na sua procura: La maldición de Gilgamesh. Antologia de la poesía iraquí contemporánea. Ediciones La tempestad. C. Pujades, 6 - Local 2. 08005-Barcelona. Primeira ediçom de Janeiro de 2005. ISBN: 84-7948-024-6.]

Má sorte

Nascerei no século vindeiro
nascerei em Bagdad
também.
Tenho má estrela
o meu pai sera o mesmo
a minha mae,
e os meus amigos seram os mesmos.
Mas eu
desgraçado -como digem-
incluso até para nascer.
-Isso é o que ocorre de facto-
-Nom nascer noutro lugar
Ainda quando morrera...
nom morrerei
noutro
lugar.

Abdelamir Yaras (Nascido em Bagdad em 1966. Exilado no Cánada, onde morreu em 2003. Publicou dous poemários: Poemas contra o vento, em 1992, e Tristeza nacional, 1997).

O Sarmento que nom chega

2005-03-08T13:30:00.000Z

No 18 de Maio de 2002, ao fio da celebraçom do Dia das Letras, Galegas por suposto, dedicado a Frai Martim Sarmento, em Vila Franca do Berzo, os presidentes das comunidades autónomas de Galicia e Castilla y León, assinarom um convénio de colaboraçom para a criaçom e posta em marcha dum centro sociocultural naquela vila, no mesmo lugar onde estivo a casa natal do escritor berziano, e, portanto, galego.
Como podem todas as leitoras e leitores imaginar, tal projecto ainda nom é realidade, nem parece que vaia ser em breve.
O acordo assinado polo ex-ministro franquista Manuel Fraga, em qualidade de Presidente da Xunta, e Juan Vicente Herrera, ambos os dous do mesmo partido político, o PP, estabelecia que o custo do projecto, calculado em 408.809 euros (toma precissom!), seria assumido a partes iguais polas duas administraçons autonómicas, e que seria o Concelho de Vila Franca quem se responsabilizaria da sua gestom e mantemento. Além do mais, no acordo assinado figurava a data de primavera de 2004 para a sua posta definitiva em funcionamento.
A dia de hoje, o tal centro ainda nem existe. O solar, onde estivera a casa do autor, sigue a ser um solar abandonado, na bem centrica rua da Água, e o alcaide de Vila Franca, o psoecialista Vicente Cela, qualifica de insulto e provocaçom o retraso.
Mas, por umha vez, nom tem a culpa a Xunta de Galicia, ao dizer do alcaide, mas a Junta de Castilla y León, à que acusa de desentender-se e nom mostrar interese nengum no tema, mentres que a Xunta delega oficialmente toda responsabilidade na Junta.
Publicamente tem declarado o alcaide que a Xunta tem mostrado em todo momento interese pola construçom do Centro Sociocultural, mas que é a Junta a que, segum ele inexplicavelmente, mostra "reticencias" ao cumplimento do acordo.
Mais umha vez, nada novo baixo o sol. Da mesma maneira que a Junta de Castela e Leom tivo que assinar, quase por imperativo legal como quem di, o acordo que estabelecia umhas raquíticas mas reais possibilidades de ministrar língua galega nos centros educativos da nossa comarca, também foi por imperativo quase legal que tivo que sumar-se à celebraçom do Dia das Letras em Vila Franca, e de todo aquele rebúmbio saiu um acordo que, ao igual que no caso das aulas de língua galega, nem entendem nem tenhem vontade de entender nem desenvolver.
Valhadolid nom tem nem ideia de que é isso de que no Berzo falam galego, entre outras cousas porque nem sabe onde é que fica o Berzo, política, histórica e geograficamente falando. Já comentei noutro post, que é impossível que da administraçom castelao-leonesa saia nengum avanço nem nengumha acçom possitiva para o Berzo mas que por pressom social. E, no caso deste centro sociocultural, que tam necessário é e tam útil seria, a pressom social deve ser ainda maior. Isso é o que claramente está transmitindo o PP desta comunidade autónoma que ninguem entende.
A Junta de Vicente Herrera está, simplesmente, aguardando que Vila Franca se esqueza do tema. E neste caso, nom tivo muita boa sorte, porque o alcaide, desde as anteriores eleiçons, é do PSOE, e nom do PP como antes. E olhem, ainda para mais informaçom, que a concelheira de cultura é da UPL. Mas também é em Vila Franca onde está umha das organizaçons em defesa da língua galega do Berzo, a Escola de Gaitas. É por isso que sabemos que em algum momento será realidade esse projecto. Mas entre todos e todas, deveriamos presionar para que fora realidade o mais pronte possível.

Tarsicio goes to Hollywood

2005-03-07T11:55:00.000Z

Já baixo a sua direcçom, o Partido do Berzo (PB), apresentara-se numhas eleiçons ao Parlamento espanhol nas circunscriçons (províncias) galegas da Comunidade Autónoma Galega, mas agora, na direcçom do Partido Regionalista do Berzo (PRB), criado por ele mesmo depois da sua saida da direcçom do PB e do próprio PB, Tarsicio Carvalho amenaza com apresentar-se às autonómicas galegas para, segum ele di, "hacer bajar de la burra a PSOE, PP y BNG; únicos culpables de que El Bierzo, Lugo y Valdeorras queden aislados del resto de España", em referência à polémica sobre o AVE, Tren de Alta Velocidad Mixto, ou o que quer que finalmente se vaia construir.
Di Tarsicio I O Inesgotável, que as siglas do PRB estam disponíveis para quem as queira usar nas eleiçons da CAG, para reivindicar um autêntico tren de alta velocidad, que nom pode ser menos que o AVE, e que tal candidatura seria, sem lugar a dúvidas, a chave da governabilidade do próximo governo galego.
Tarsi é dos que se aponta a um bombardeio se é necessário para sair nos meios. E logra-o, que para isso leva nisto da política, berzianista, várias décadas. Mas deveria afinar um pouco mais as suas opinions. Porque a verdade é que nem o Berzo nem o resto da Galiza precisa um AVE, Tren de Alta Velocidad, ou como se queira chamar. Aí estam (por exemplo em 1, 2 e 3) as opinions de organizaçons ecologistas contrárias por completo a esa barbaridade.
Mas já se sabe que os políticos do sistema gostam destes projectos mais que um parvo dum rotulador. Como no caso da Ministra do post anterior, todo é fume. Nesse caso aeronáutico, neste ferroviário. Mas fume. Contaminaçom, vaia.
Deveria levar em conta a legenda do cartaz que aparece nas montanhas, nos rios e nos vales do Berzo, fazendo um chamamento à sua protecçom por parte de todas as pessoas que visitam esses lugares, e que di isso de "Soy Bierzo, cuidame".

Vender fume aeronáutico

2005-03-04T12:37:00.000Z

O Grupo Voz é especialista em vender fume sempre que quer. Fai-no muito bem na Comunidade Autónoma Galega, e também sem nengum problema na Comunidade Autónoma de Castela e Leom. Esta é a capa do Diario de León de hoje, na sua ediçom do Berço, e esta a "notícia" (panegírico seria mais acertado) sobre o tema.
Pretender que "una de las posibilidades reales que se desprenden de la iniciativa es que, por ejemplo, se vea ese nombre en el aeropuerto de Moscú, Beirut o París", é umha soberana estupidez: todo o mundo sabe que é impossível ver o nome dos avións nos aeroportos. Mas, ainda que assim for: qual seria o resultado? É que os moscovitas, por exemplo, vam visitar as Médulas porque leam (se é que entendem o alfabeto latino) esse nome num aviom? É que as Medulas vam estar melhor protegidas, mas cuidadas, mais atendidas, porque o seu nome esteja num aviom?.
As declaraçons da ministra nom tenhem desperdício. Mais fume: "Para la ministra de Cultura, Las Médulas servirán para incidir en «dar a conocer un país que se llama España y que se apellide cultura», aseguró la ministra". Já sabem, a partir de agora, o Estado espanhol chama-se oficialmente "Reino de España Cultura".
E esta tontaria publicitária (que a saber quantos euros custou) é digna dumha capa dum jornal que se pretende sério?
Com todo, no bar, mentres miravamos a notícia, coincidimos em que o único bom de todo isto, era a chaqueta da ministra, que é realmente bonita. Mas para luzi-la, nom fazia falta montar um espectáculo assim. Mas claro, é a ministra de Cultura, e já se sabe o que significa cultura para os progres.

PD/ O dia que fagamos um post sobre os vinhos do Berzo, falaremos sobre o facto, que só aparece resenhado na capa, de que no posterior "ágape", as autoridades presentes (que eram todos os presentes) brindarom com vinhos da Rioja... Isso sim que é promoçom da comarca!

Em que idioma cantavam os "reis de leom"?

2005-03-03T14:27:00.000Z

O músico Eduardo Paniagua é o responsável dumha colecçom de discos, que, recuperando as Cantigas de Afonso X "O Sábio", realiza a loável tarefa de achegar a obra desse autor, centrando-se no livro das Cantigas de Santa Maria.
Segum di a sua discográfica, Pneuma, as Cantigas de Santa Maria, que qualquer estudante de primária ou secundária da Comunidade Autónoma Galega saberia relacionar com a literatura galega e como escritas em galego ou galego-português, estam escritas em "lengua galaico-portuguesa". Desconhecemos se é que o músico tem algum problema com a denominaçom de língua galega, ou galego, ou se é que evita conscientemente essa denominaçom por motivos de mercadotêcnia, nom vaia ser que alguem pense que é um filo-nacionalista galego por dizer que aquele rei escrevia em galego, ou galego-português, asociando assim a nossa língua a terreos aos que normalmente lhe está vedada a presência: a Cultura, com maiúsculas.
Mas, mais chamativo ainda é o modo em que discográfica e músico apresentam a obra do nosso autor. Umha série de discos que respondem aos títulos de Cantigas de Castilla y León, Cantigas de Extremadura, Cantigas de Toledo, Cantigas de Madrid, Cantigas de Castilla-La Mancha,... Vaia, alguem haverá que pense que nom existem as cantigas galego-portuguesas!
Por suposto, todas som cantigas galego-portuguesas, cantadas em galego-português, tal e como forom escritas por Afonso X. Mas, seguramente com a intençom de ser melhor vendidas em aquelas comunidades autónomas às que fai referência, som apresentadas baixo esse rótulo, idenficando além do mais os antigos reinos com as actuais comunidades autónomas, dumha forma bem pouco histórica: "Las cantigas que narran hechos acaecidos en los históricos reinos de León y Castilla, como era conocida antes del siglo XIII el área que hoy en día se denomina Comunidad de Castilla y León, han sido agrupadas bajo el nombre de Cantigas de Castilla y León".
Ainda assim, o disco, e o conjunto dos discos, distribuidos por Karonte, som mais que recomendáveis. Por dous motivos: porque som, do ponto de vista musical, interesantes e muito boas obras; e porque som, do ponto de vista da reivindicaçom lingüística, interesantes e muito bons argumentos. Como era que um suposto rei de Leom escrevia em galego-português? Entom, em que idioma falavam?, em que idioma cantavam?
As rádios do Berzo deveriam emitir de quando em vez algumhas dessas cantigas agrupadas baixo o título de Cantigas de Castela e Leom, para entender quê é o quê é o Berzo.

Galego na nossa naçom?

2005-02-23T18:20:00.000Z

Comenta Bretemas, a proposta de ERC no Congresso espanhol, que aparece em galego.org, para estudar todas as línguas oficiais do Estado espanhol dentro do sistema educativo em qualquer ponto desse estado, ao tempo que se potenciam essas línguas dentro nos centros universitários. O que vem significando que, como titula galego.org, podas estudar galego em Alcorcom ou basco no Carbalhinho.
Bretemas, anima aos "nossos" deputados para que tomem cartas no asunto, e apresentem iniciativas semelhantes. Nom estaria mal, mas...

A mim bem me pareceria com que os parlamentários galegos e galegas, em Compostela e em Madrid, se preocuparam e conseguiram que os alunos galego-falantes de fóra da Comunidade Autónoma Galega puderam estudar língua galego com completa normalidade na ESO, em Primária, na Universidade,...
Isso, a dia de hoje, sim que é um repto.Dizer-lhe aos murcianos, aos riojanos ou aos andaluzes, que tenhem que estudar galego (e catalám e basco -e imagino que astur-llionês e aragonês, que algum diar terám que conseguir a oficialidade ou cooficialidade-), quando nom conseguimos que no Berzo, no Eu-Návia, na Seabra e no Val de Elhas podam estudar galego com normalidade (com tanta normalidade como na CAG, quando menos), nom me parece sério.
Nós, como galego-falantes, devemos preocupar-nos de conseguir umha ensinanza digna na nossa naçom, em todos os territórios galego-falantes, cousa que hoje em dia nom ocorre.
E os espanhol-falantes, em todos aqueles territórios, que se preocupem de dignificar a sua ensinanza. Mas, da mesma forma que nom queremos que venham de fóra dizer-nos o que temos/devemos fazer, nom vaiamos nós fóra dizer-lhes o que tenhem/devem fazer.

Penso eu, vaia, com todos os respeitos.

Arraiando-nos

2005-02-21T16:57:00.000Z

Levo vários dias querendo escrever algumha cousas sobre o número dous da revista Arraianos, editada pola Asociación Arraianos, de Celanova, e que me chegou por meio do bom companheiro e amigo Baldo Ramos, autor da capa e contracapa da mesma, mas por umhas cousas (1 e 2) ou por outras ainda nom tivera tempo de pôr-me diante do computador. Chegado de Compostela, logo de andar polo Pico Sacro e Carnota, decido escrever estas linhas, pois me parece justo falar do que paga a pena que seja conhecido.

Deste segundo número da revista Arraianos, destaco especialmente as páginas dedicadas à campanha para o reconhecimento da cultura imaterial galego-portuguesa como Património da Humanidade por parte da UNESCO. Junto com este interesante trabalho, publicado baixo o sugestivo título de "A raia é nos@" (e que inclue umha ampla e completa Bibliografia Urgente da Raia , um outro trabalho sobre a vida e a morte na obra de Teixeira de Pascoaes e Otero Pedrayo e ainda um artigo de Pedro Alonso sobre a serra do Gerês, som o mais interesante (aos meus olhos), deste número.

Mas as suas 70 páginas, completam-se com outros muitos textos, trabalhos e notícias, sempre atendendo e tendo como referência a Raia, ou as Raias, existentes no País: poesias de Gabriela Príncipe, Lois Antón, Eduardo Estevez, Franck Meyer, Baldo Ramos, Sechu Sende e este que escreve; apresentaçons de diversos roteiros na zona da Raia; um pequeno texto de Quique Costas sobre Os outros arraianos galegos, os valegos do Ellas, na Estremadura; entrevistas aos académicos correspondentes da RAG, nomeados recentemente: Carlos Varela, do Eu-Návia (Deveria haver um convénio cultural e lingüístico entre as Asturias e Galiza), Domingo Frades, das Elhas (Para nós Galiza supom um enriquecimento muito forte), Felipe Lubiam, da Seabra (O galego aqui desaparecerá unicamente se desaparecem os povos), e Heitor Silveiro, do Berzo (No Berzo vivemos o tema da língua quase como na Galiza se vivia antes da democracia); banda desnhada; recurtes de imprensa; etc...

Estamos ante umha recomendável publicaçom, e ante um interesante colectivo de pessoas, que com esforço e ilusom conseguem achegar-nos a um mundo tam próximo e tam afastado como é o da Raia. Imagino que a revista há-se de atopar com facilidade em várias das poucas boas livrarias e quiosques que temos na Galiza, e desde esta outra Raia, neste caso berziana, animo às leitoras e leitores deste blog a que se acheguem a ela. E é que, como já dijo Vicente Risco, "tu dis que Galiza é bem pequena. Eu digo-che que Galiza é um mundo".

Siena

2005-02-15T15:49:00.000Z

Das cousas das que mais gosto quando visita umha cidade ou umha vila é conhecer as suas livrarias. Sempre dedico algum tempo (minutos ou horas, dependendo), a entrar em algumha boa livraria e remexer entre os andeis.
É por isso que quero fazer umha recomendaçom para as pessoas que visitem o Berzo. Nom existem muitas livrarias merecentes de tal nome nesta comarca, ou se existem eu ainda nom dim com elas. E digo que nom existem muitas por nom dizer que só existe umha: livraria Siena, em Ponferrada.
Nom tem página web, assim que nom podo recomendar a sua visita virtual. Mas recomendo, e muito, a visita ao seu local, na rua Antolin López Pelaez, nº 17, umha rua céntrica, paralela à parcialmente peonal Avenida da Espanha, e que também vai desde a Praça de Lazúrtegui até a Praça de Fernando Miranda.
É umha livraria-galeria, que sempre tem exposiçons interesantes. Mas, sobre todo, é umha livraria das que já nom há muitas: com umhas pessoas que sabem que é o que tenhem entre as maos, e com as que se pode falar ainda de livros, arte, cultura e outra muitas cousas relacionadas.
E, por suposto, como som livreiros de verdade, e nom expendidurias de bet-sellers e material de papelaria, tenhem livro galego e português. Junto com as suas boas secçons de poesia, arquitectura, cinema, infantil, etc... podemos atopar livros da Porto Editora ou Caminho, ou de Xerais, Galaxia, Positivas e Abrente Editora, pois contam com um pequeno, mas interesante, fundo dessas editoriais.
Quem venha conhecer o Berzo, que nom esqueza visitar esta livraria. Do melhorzinho da comarca.

Os inconvenientes de sermos berzian@s

2005-02-13T18:03:00.000Z

Está que se sae o Diário de Leom nestes dias... Hoje, surprendem-nos, nas suas páginas do Berzo, com umha análise, assinada por Alejandro J. García, que nom di nada que ninguem que viva no Berzo nom saiba, mas que nom aparece normalmente nos meios de comunicaçom massivos, na chamada imprensa "séria", quer dizer, a do sistema.
Que o Berzo sofre umha evidente marginalizaçom por parte primeiro de Leom (capital provincial) e depois de Valhadolid (capital autonómica), é umha cousa que nom se pom em dúvida no Berzo, mesmo o PP e o PSOE denunciam de quando em vez, quando lhe resulta rendível eleitoral ou políticamente, essa situaçom. Mas nom se trata só de discriminaçom no terreo económico ou das infraestruturas. É umha situaçom que se vive no dia a dia em todos os terreos e em todos os aspeitos sociais: também no laboral, no educativo, no cultural,... O que sucede é que ainda nom existe nengumha organizaçom (plataforma, grupo político, organizaçom social, sindical, juvenil, etc.), que seja quem de dar forma a esse sentimento de viver umha situaçom injusta e dote de conteudo a umha ampla campanha de denúncia da mesma.
Nem do PP nem do PSOE, nem de nengumha organizaçom de obediência leonesa ou castelam-leonesa vai poder vir a soluçom. Como tenho dito noutros comentários, assumir realmente a questom berziana supom denunciar e regeitar a actual divisom político-administrativa emanada da Restauraçom Borbónica, e abrir o que para os grandes partidos de obediência espanhola é a Caixa de Pandora da reorganizaçom territorial.
O Berzo nom pode seguir sendo umha comarca sem capacidade para autogovernar-se e decidir o seu futuro livremente, porque isso supom a sua lenta mas segura morte. Dos sectores progressistas, de esquerda, alternativos e revolucionários tem que vir a resposta. E aí deve estar presente a esquerda independentista galega, dinamizando estruturas que possibilitem a confluência desses sectores.
No Berzo estamos a viver o resultado da falta de decissom, valentia e coragem por parte do nacionalismo e o independentismo galego nos últimos 30 anos (como mínimo). Nom devemos repetir essa nefasta experiência. Nom avançar, significa retroceder.

Maricarmen Lugris

2005-02-12T16:29:00.000Z

Nom só foi a precariedade a que impediu que pudera actualizar este blog nos últimos dias. Na terça-feira 8 de Fevereiro, terça de entruido (e nom por casualidade), as três menos vinte, morria em Uvieu, onde vivia desde há mais de 30 anos, Maricarmen Lugris.

Maricarmen, irmá da minha mae, artesá, entusiasta e sempre cheia de vida, batalhou contra o cáncer durante os últimos 15 anos, até que nesse dia de entruido, pronta para se poder disfarzar de meiga e sair voando tal e como sempre dijo, decidiu dar a última batalha. Perdeu-na, mas ganhou a guerra. O cáncer ficou dono do seu corpo, mas ela sigue viva.

Na madrugada da terça-feira saimos cara Uvieu, aonde chegamos às sete da manhám. Justo para estar as últimas horas com ela. Morreu rodeada de amigas e amigos. Umha morea de boas pessoas que sempre estiverom ao seu carom nestes últimos anos. É-me practicamente impossível descrever ainda como transcorrerom essas horas, esses dous dias. A emoçom pudo-nos a todas e todos os que lá estivemos. E também a quem, por diferentes causas, nom pudo estar.

Na quarta-feira, às seis e meia da tarde, incineramos o seus restos. Ia vestida com as suas roupas, com um pantalom e um jersei feito por ela. Com um dos seus gorros de lá, morado, com umha pluma, e com os seus zapatos de pementos, dos que tam orgulhosa estava. Com ela, algumhas das suas lás, a sua paixom e substento. Na morgue do hospital, duas horas antes, despedíramo-nos dela recitando alguns poemas em galego, em asturianu e em espanhol, e lembrando algumhas das suas inumeráveis anedotas. A sua memória, que fica em todas as pessoas que tivemos a sorte e o privilégio de conhecé-la, manterá-a viva. Para sempre.

Tal e como ela queria, nom houvo nengum tipo de cerimónia religiosa, nem esquelas, nem cruzifijos. E conseguimos, para respeitar a sua vontade, que as lágrimas nom impediram a presência das risas.

No próximo Sábado, 19, as suas amizades e a sua família reuniremo-nos na Galiza para esparcir as suas cinzas, e mais umha vez, juntos, lembrar-nos dela coa seguridade de que ela estará com nós. De manhám, visitaremos o Pico Sacro, onde esparciremos parte das suas cinzas. De tarde, iremos até Carnota, onde também esparciremos as cinzas e comeremos juntos na sua honra.

Ela queria-o assim. Nom ver-nos tristes e abatidos. Mas contentos e felizes. Lembrando-nos dela diante dumha mesa e com umhas garrafas de vinho. Para brindarmos à sua saude.

Sempre nos dijo que ela um bom dia, cansa, como foi, de tanto luitar contra o cancer, mas contenta e cheia de vida por ter conseguido viver alegre e feliz todos estes anos, colheria umha vasoira e iria descansar a algumha das estrelas do ceu. Sem dúvida, foi assim. E desde lá enriba, mira-nos e brindará com nós. Com um bom vinho tinto e polvo com cachelos.

Foi, sigue a ser, umha mulher excepcional. Única. Mágica.

Na sua memória, traio cá umha poesia de Rosalia de Castro, outra das suas grandes paixons:

Cando penso que te fuches,
Negra sombra que me asombras,
Ao pé dos meus cabezales
Tornas facéndome mofa.

Cando imaxino que es ida,
No mesmo sol te me amostras,
I eres a estrela que brila,
I eres o vento que zoa.

Si cantan, es ti que cantas,
Si choran, es ti que choras;
I es o marmurio do río,
I es a noite, i es a aurora.

En todo estás e ti es todo,
Pra min e en min mesma moras,
Nin me abandonarás nunca
Sombra que sempre me asombras.

Que idioma falavam os reis de "Leom"?

2005-02-12T15:30:00.000Z

Ainda que esteja em espanhol (nom é tam progre o Diário de Leom como para permitir escrever em galego, e menos nas suas páginas de Opiniom, mesmo que a empresa proprietária seja o Grupo Voz), chamo a vossa atençom sobre este artigo, "Que idioma falavam os reis de Leom?", de Carlos Antonio Bouza Pol, aparecido o dia 10 de Fevereiro, quinta-feira, na página 6 do citado jornal.

Eu, desde logo, nom compartilho muitas das cousas que di o seu autor, mas parece-me interessante. Muito mais, que aquel do Gavela ao que fazia referência há uns dias. E muito mais, sem dúvida, que o que normalmente aparece sobre este tema nos meios de comunicaçom no Berzo como "artigos de opiniom" e que nom som mais que as demostraçons de ignoráncia dos seus autores a respeito da realidade lingüística e cultural da nossa comarca.

Mágoa que o Grupo Voz nom tenha realmente interese na defesa e promoçom da língua galega, porque de ser assim, o Diário de Leom poderia estar fazendo muito pola dignificaçom e normalizaçom lingüística nesta comarca da Galiza, no Berzo.

A precariedade

2005-02-06T17:46:00.000Z

Decidim documentar-me para escrever este comentário, para ser claro no que pretendia dizer. Lograria-o?

"Precaridade ou Precariedade s. f. Qualidade de precário", di o e-Estraviz.

E entom fum procurar "precário".

"Precário adj. (1) Que nom oferece garantias de ser estável ou seguro. (2) Débil, frágil: saúde precária. (3) Difícil: condições precárias. (4) Que, emprestado ou concedido, deve ser devolvido. Conceder a título precário: conceder com direito a recuperaçom, sem ter que indemnizar. Sinóns. Contingente, inconsistente, inseguro. Apertado, deplorável [lat. precariu]".

E depois fum procurar "temporal".

"Temporal adj. (1) Que passa com o tempo, que nom é eterno: o homem é temporal. (2) Relativo às cousas materiais: prazeres temporais. (3) Anat. Relativo às partes laterais da cabeça ou fontes da cabeça: nervo temporal. O poder temporal dos papas: poder dos papas, como soberanos territoriais, quando existiam os estados da Igreja. s. m. (1) Grande tempestade: um temporal de neve. (2) O poder temporal. (3) Anat. Cada um dos dous ossos simétricos, laterais, da caixa craniana, que nos vertebrados superiores se situa nas regiões laterais do crânio. (4) pop. Desavença. Sinóns. Temporário, passageiro, provisório, mundano, profano; borrasca, tempestade, tormenta [lat. temporale]".

E, por último, fum procurar "trabalho".

"Trabalho s. m. (1) Acto ou efeito de trabalhar: trabalho manual; nom encontra trabalho. (2) Aquilo em que se trabalha ou se trabalhou: contemplo o seu trabalho. (3) Esforço humano que produz riqueza: lutas do capital e o trabalho. (4) ext. Esforço, actividade de animal ou máquina: um animal de trabalho. (5) Mec. Efeito de uma força que vence uma resistência, medido polo produto da resistência polo caminho percorrido na sua direcçom. (6) Modo como um objecto está executado: esta mesa tem um belo trabalho. (7) Fenómeno que se produz numa substância: trabalho da fermentaçom; o trabalho de certas madeiras pode produzir fendas nelas. (8) Estudo escrito sobre um assunto: um trabalho sobre o problema do marisqueio; um trabalho sobre Pondal. (9) Fís. Funçom trabalho: energia necessária para libertar um electrom de um corpo. (10) Deliberações: os trabalhos da Comissom. pl. (1) Penas, sofrimentos, desgostos: passar trabalhos. (2) Dificuldades: muitos trabalhos passamos para chegar à costa. Trabalhos forçados: pena infamante que consiste no trabalho obrigado e excessivo. Sinóns. Labor, obra, ofício, produçom, serviço, tarefa [de trabalhar ou b. lat. tripaliu]".

E, todo isso junto, Trabalho Precário e Temporal, é o que explica que nos próximos dias tenha problemas para atender este blog. Disimulai-me o problema.

Leom, Castela, astur-leonés, arameu e políticos (e 2)

2005-02-03T10:16:00.000Z

Para terminar, por agora, com esta mini-série de comentários sobre o Berzo, organizaçons políticas e língua(s), recuperamos hoje um outro encontro digital. Tam só um dia depois do chat ao que faziamos referência onte, o Diario de León organizava um outro encontro no que participava o candidato por Leom da UPL (Uniom do Povo Leonés) nas eleiçons ao Parlamento espanhol, Pedro Munhoz, alcaide do município berziano de Toreno por essa mesma organizaçom.
Novamente, é perguntado o entrevistado polo tema da língua leonesa. E este alcaide do Berzo, com mais cintura e mao esquerda, e candidato dumha organizaçom leonesista que di defender a língua (leonesa), aposta por umha resposta muito mais politicamente correcta que a do responsável de IU. Transcrevo-a tal qual foi publicada (é a pergunta 19):

Pergunta: "Norabona Pedru: ¿Cuál es la postura de tu partido hacía el leonés?"
Resposta: "La defensa de la nuesa llingua y los nuesos raigones ye una obligación pa la UPL. Puxa'l País Llïonés".

Certo que nom foi perguntado pola língua galega, mas também certo que ele, que conhece, ou deveria conhecer, a situaçom de minorizaçom e falta de promoçom tanto da língua leonesa como da galega no Berzo, deveria fazer umha referência. E é que, se visitades o web da UPL, descobriredes que nom há referência nengumha, nengumha, nengumha nem ao que o alcaide de Toreno chama a "nuesa llingua", nem aos "nuesos raigones". E é que parece que, como os bons políticos de salom, a UPL considera que defender a língua minorizada "ye una obligación" na epoca de eleiçons nada mais.

Leom, Castela, astur-leonés, arameu e políticos (1)

2005-02-02T17:52:00.001Z

Levava muito tempo querendo recuperar umha entrevista-chat que o Diario de León publicara durante as últimas eleiçons ao parlamento espanhol, e aproveitando o comentário sobre o Partido do Berzo e a língua galega, animei-me a bucear por internet para dar com ela.
Porque pode que algumhas pessoas que leram o comentário de onte pensem que algumhas organizaçons das citadas podem ser mais receitivas no tema da língua galega no Berzo, e nom todas respondam ao mesmo patrom. Vou pôr portanto um outro exemplo, que ao meu modo de ver, redunda no dito mais abaixo: desde, e desde dentro de, a artificial comunidade autónoma de Castela e Leom é impossível conseguir a plena dignificaçom e normalizaçom da língua galega. E o mesmo pode dizer-se da província: desde dentro da província de Leom é practicamente impossível conseguir umha situaçom normalizada para o galego no Berzo. Mas nom só da língua galega: mesmo é impossível a dignificaçom da lingua leonesa, ou astur-leonesa.

Como poderam ver, no encontro digital que o entom coordenador provincial de Izquierda Unida em Leom, Germán Fernández, mantem com os e as internautas no dia 9 de Março de 2004, a novena pergunta é referida ao tema da língua leonesa. Transcrevo-a literalmente (em espanhol, que é como foi publicada) para que nom haja lugar a dúvidas (e porque a verdade é que se comenta por si soa):

Pergunta: "¿Qué hace o hará su partido por el llïonés?".
Resposta: "Nada, y por el arameo tampoco".

Em nengum momento nos dias e semanas posteriores houvo nengumha rectificaçom ou aclaraçom por parte do tal Germán Fernández ou por parte da sua organizaçom, que, por certo, nom conseguiu obter nengumha representaçom na circunscriçom provincial de Leom.
Esta é a resposta exemplar dum represante dumha organizaçom que se autodenomina "progressista". Imaginemos como será a das organizaçons nom-progressistas...

PD/ Esquecim-me de comentar como é que dim com a citada entrevista. Ainda que nom o creades, foi assim (4ª entrada, 1ª página).

Um exemplo e umha conclusom

2005-02-01T21:30:00.000Z

O Partido do Berzo (PB) celebrou um Congresso Extraordinário neste fim de semana passado, e, para além doutros temas, falou também sobre a língua galega. Nom é que tenham dado um grandíssimo passo adiante, mas iniciárom o caminho, e é justo reconhecer-lho. Segundo informa a imprensa, aprovárom, nom sem debate, o compromisso político de protegerem e fomentarem a língua galega, tanto dentro da própria organizaçom, como na sociedade. Além do mais, também acordou permitir o uso da nossa língua a nível interno, nas reunions e assembleias, "sempre e quando haja um tradutor".

Pode que para algumhas pessoas, sobretodo dentro da Comunidade Autónoma Galega (CAG), um compromisso assim seja insignificante. Mas nom é certo. Decerto, muitas pessoas poderemos considerá-lo insuficiente, mas nom é insignificante. Tem muito valor e representa um novo pequeno grande passo de cara a conseguirmos a normalizaçom lingüística no Berzo e no conjunto da Galiza oriental.

Tal e como Fala Ceive tem expresado publicamente aqui e aqui, o desejável seria que outras organizaçons com presença na comarca, como podem ser o PP (que governa em Ponferrada), o PSOE (que tem a presidência do Conselho Comarcal do Berzo), ou IU asumissem posturas semelhantes, mas muito tememos que nengumha dessas organizaçons vai ser capaz de iniciar, como o PB, esse caminho, porque isso significaria enfrentarem-se às suas direcçons provinciais, em Leom, e autonómicas, em Valhadolid. O que demonstra o exemplo do PB, que é umha organizaçom que nom tem dependências mais alá do Mançanal, é que dentro desse ente artificial chamado Castela e Leom é muito dificil conseguir a dignificaçom do galego.

H4ck3rsBr Group nom é umha boa pessoa

2005-01-31T21:45:00.000Z

Um grupo de hackers brasileiros vem de hackear o web www.galizalivre.org, deixando lá umha estúpida mensagem que di: " Alguem Sabe o endereço da cidade das mulheres que o Jeremias Desperdiçou?
Se souberem nos avisem: h4ck3rsbr_group@linuxmail.org . greatz: SU3D_R3 pitt3r_p4rk3r s8ldier S4P0 THE_DANZ Aleks f0rtcu xb0x Eguinha pocotó e todo mundo que eu esquci :D".
Gzlivre, que leva já vários anos na rede, é um dos portais galegos mais visitados, e é umha ferramenta de trabalho, umha entre outras muitas webs na rede, que a esquerda independentista conseguiu criar, com o esforço e a ilusom de muita gente, e entre elas a de Raul Marinho.
Desde este pequeno blog, quero transmitir-lhe aos idiotas que venhem de fazer esse ataque que o único que conseguirom é fazer mais difícil o trabalho a quem, com muitas dificuldades, contra vento e maré, luita por um mundo melhor dia a dia, desde um pequeno recanto do mundo chamado Galiza. Que hoje, os assassinos, os imperialistas, os fascistas, os opressores, os capitalistas, os donos das grandes multinacionais, os governos ocidentais,... estám um pouco mais contentos (mesmo que nom saibam que essa pequena ferramenta foi hackeada), e que nós temos um pouco mais difícil que onte seguir caminhando. Mas que ainda assim, seguiremos a caminhar.
E desde cá, também, o meu apoio e solidariedade com www.gzlivre.org e com todas as pessoas que a fam possível, e com certeza a seguiram a fazer possível quanto antes.

Meios e alternativas

2005-01-30T21:20:00.000Z

Na última jornada do Foro Social Galego, que a Plataforma Galega polo Nom à Constituiçom Europeia celebrou em Compostela nos passados dias 20, 21 e 22 de Janeiro, tivem a oportunidade de conhecer, entre outras interesantes pessoas, a Mauro Bulgarelli, deputado no Parlamento Italiano inscrito dentro do grupo do Partido Verde.
Entre as diversas questons que sairom na conversa com ele e com outras pessoas durante o jantar e um posterior passeio polas ruas de Compostela, ele comentou a experiência italiana das televisons de bairro.Estas som pequenas emisoras de televisom livres, autónomas, de pequeno alcance na sua emissom, que operam em umhas quantas ruas, ou em um bárrio unicamente. Contando com umha pequena inversom, que segundo ele ronda os mil ou mil e quinhentos euros, e um simples reprodutor de vídeo, consigue-se montar umha emisora de televisom que, pola sua reduzida equipa, pode empregar-se para emitir por horas em diferentes bairros, achegando informaçom directa bem sobre questons relativas exclussivamente a esse bairro ou essas ruas onde emite, ou bem informaçom de tipo mais geral para aquelas emisoras que se movem dumhas zonas a outras seguinto um horário público e conhecido para facilitar que as pessoas interesadas podam sintonizar essa televisom.
Segundo ele relatava, existem na Itália mais de 1000 pequenas emisoras de estas características emitindo diariamente, muitas delas relacionadas com movimentos, organizaçons e colectivos de esquerda, alternativos, radicais, ecologistas, feministas, etc..., e o Governo italiano, que até o de agora nom se preocupara delas, pretende ilegalizá-las e fechá-las.
Pode ser que o Berlusconi-que-todo-o-controla tenha encontrado ao pequeno David que o vaia tumbar com umha pequena pedra e umha onda, mediática. Pode ser que seja umha boa ideia para ter em conta.

Existe a Rádio Galega?

2005-01-29T09:58:00.000Z

Comentou-me um amigo que agora (nom sei desde quando) a Rádio Galega tem umha emisora que só emite música. Vaia, pensei eu, alguem tivo umha boa ideia na CRTVG, incrível. E lá fum sintonizar essa emisora.
Intentei-no primeiro desde o meu aparato de rádio, mas nom conseguim dar com ela. Cá, no Berzo, sintonizam-se sem problemas a Rádio e a Televisom Galega, mas nom conseguim dar com essa emisora da RG que só emite música.
Mas nom desesperei. Botei mao dos meus escasos e rudimentares conhecimentos da informática e internet, e naveguim pola rede até dar com o web da Rádio, imaginando que lá estaria a ligaçom para com essa emisora. E assim foi.
Assim que, pensei, mentres atendo os meus correios electrónicos, actualizo o meu blog e cumplo com algumhas responsabilidades contraidas com diversas entidades, podo escuitar pola rede a música que ponham. E também, assim foi.
O único problema é que levo mais de duas horas a ouvir esta "Rádio Galega Música", e em todo este tempo nom puidem ouvir umha soa cançom de algum grupo galego: todo (mais do 90% do que eu levo escuitado) é música espanhola e/ou em espanhol, incluindo cá a da américa latina espanhol-falante, e umha pouca música anglosajona (ianqui ou inglesa). Podia ser perfeitamente umha emisora musical na Rioja, em Múrcia ou na Estremadura. Ou nom, com toda probabilidade de existir lá umha emisora dessas características, nom seriam tam recalcitrantemente espanholistas. Tam absurdamente anti-galegas.
Nem umha soa cançom em galego, e de música brasileira, portuguesa ou de outros países de expressom portuguesa já nem falamos.
Logo ainda diram que o problema para a normalizaçom lingüística na Galiza é a existência do reintegracionismo. Vai ser que o programador da RG é da AGAL ou quê?

PD/ Para curar-me em saude, já comento que a minha intençom nom é que a RG emita só música galega, mas que emita maioritariamente música galega. E para isso nom tem que pôr a todas as horas a Milladoiro: existem multidom de grupos e solistas dos mais diversos, variados e diferentes estilos, do rock ao blues, do folque ao jazz, do pop à new age, da música electrónica à clássica, do heavi ao ska,... Músicos/as galegos/as e em galego.

Literatura, simplesmente.

2005-01-29T09:35:00.000Z

Envia o companheiro Ramiro a informaçom sobre um recital de poesia na Corunha, organizado polo Tangaranho Vermelho:
"O blog de criaçom e pensamento O Tangaranho Vermelho celebrará assim o seu primeiro acto público este Sábado às 20 horas no Centro Social A Treu, sediado na Rua Sam José, número 12. Este acto consistirá num recital poético no que participarám Alicia Fernández, Cruz Martínez, Celso Álvarez-Cáccamo, Xavier Vásquez Freire, Ângelo Pineda, Miguel Vento, Diego Villar, Alberte Momán e Ramiro Vidal.
O blog O Tangaranho Vermelho nasceu em Julho de 2004 com vocaçom de espaço para a criaçom, a crítica e o debate. Mas, longe de limitar as suas iniciativas ao ámbito da rede, impulsionará actos públicos com certa freqüência".
Eu nom poderei assistir ao recital, mas desde cá, ainda que um pouco tarde, practicamente a sete horas de que se celebre o acto, recomendo assistir para escuitar algumhas vozes novas, e nom tam novas, da nossa poesia, que é também a literatura, simplesmente.

Um prémio para Gavela

2005-01-25T21:47:00.000Z

A este home deveriam dar-lhe um prémio por escrever estas cousas. Que capacidade para repetir tópicos e idioteces em tam poucas linhas e com um vocabulário tam reduzido. Ainda que original nom é muito original: escreve o que dia sim dia tambem escrevem os "opinadores" oficiais do sistema sobre naçom e nacionalismo (oprimido) e sobre naçom e nacionalismo (opressor). Quer dizer, contra as luitas, processos e movimentos de libertaçom nacional no Estado espanhol, e a favor do espanholismo, fascismo e colonizaçom.

De derrota em derrota...

2005-01-21T15:13:00.000Z

Lembro há uns quantos, já bastantes, anos, a começos de 80, que umha familiar minha comentava de quando em vez, quando aparecia algum político jovem na tele: "este estudou comigo, olha para ele, era dos mais radicais, dos que se iam comer o mundo...", e resultava que estava de subsecretário de qualquer cousa em algum Ministério, ou de parlamentário do PSOE, ou mesmo do PP, ou de governador civil em nem-se-sabe-que-província. Ou conseguira, em fim, qualquer outro bom chope, onde pudera mudar as suas preocupaçons sociais, os seus sonhos e as suas utopias, por umha piscina no seu chalet adosado, ou por umha boa nómina a cargo dos orçamentos do Estado, com gratificantes pluses e avondosas dietas incluidas.

A mim, que daquelas ainda era mais novo que agora, surprendia-me ver que tanta gente, que fazia já parte do problema, começara por fazer parte da soluçom. Como se produziria o cámbio? Era umha pergunta para a que nom conseguia atopar resposta. Como se podia transmutar tam facilmente o sangue em vinho, o verbo em carne, o oprimido em opressor? É que eram todos eles (normalmente eram todos homes, porque a começos de 80 ainda havia menos mulheres que agora que chegaram minimamente alto na política, e na vida) umha panda de vendidos? Era assim de fácil? Fôram comprados? Tentaram-nos e eles deixaram-se tentar, e pronto? Nom me convencia, porque já intuia que tinha que ser um pouco mais complicado.

Com o passo do tempo, dos anos, nom conseguim umha resposta para essa dúvida, mas mudou a minha perspectiva. Agora, nestes últimos três ou quatro anos, nom mais, já nom som os conhecidos dumha familiar de mais idade os que aparecem na tele, ou nas rádios, ou nos jornais. Agora som conhecidos meus. De quando em vez, vejo em algum meio de comunicaçom a alguém que eu conhecim nos meus anos de estudante, e que fala desde o seu flamante e epatante posto de liberado sindical, de concelheiro, de parlamentarinho do parlamentinho, de responsável de nom-sei-que ou presidente de-nom-sei-quanto, de oficinista de tal ou qual organizaçom, política, sindical, social... Vejo-os, e logo me decato de que eles, que também começarom sendo parte da soluçom, convertirom-se em parte do problema, contentos e satisfeitos de reproduzir os esquemas que há uns anos diziam querer mudar, e contando sempre com que a final de mês lhes vai chegar o seu salário, que quase sempre sai dos orçamentos públicos, completado com estupendos pluses, maravilhosas dietas e reconfortantes gastos de deslocamento. Qualquer dessas pessoas das que falo, cobra facilmente três ou quatro vezes o Salário Minimo Interprofesional. Alguns, mesmo até dez vezes, porque um carguinho num conselho asessor dumha entidade pública deve estar pagado com umha quantidade que nom somos capaz de imaginar os que imos de contrato temporal precário a contrato temporal precário.

Sigo sem comprender como é que se levou a cabo a transmutaçom do sangue em vinho, e ainda menos entendo como conseguim eu, e outras pessoas, nom transmutar. Contam-me algumhas pessoas de quando em vez: "lembras a tal pessoa ou tal outra? Pois agora está de liberado sindical na federaçom da construçom, ou do metal, ou de nom-sei-quê", e eu pergunto-me como é possível que alguem que na sua vida bateu pancada, que nunca entrou numha fábrica a currar, que nunca suou nun andámio ou andivo com a língua de fora num armazem, pode ser quem decida o rumo dum sindicato. E assi, ad nauseam.

Nom gosto da precariedade, mas de quando em vez miro ao meu redor e me alegro de ter apostado sempre pola facçom perdedora, sabendo que ainda é possível que se cumpla aquela velha palavra de orde que falava de como iamos caminhando de derrota em derrota até a vitória final.

Bicos com língua em Ponferrada

2005-01-20T23:56:00.000Z

O Teatro Bergidum de Ponferrada acolherá a vindeira quarta-feira, 26 de Janeiro, a representaçom da obra "Bicos con lingua", da companhia Talia Teatro, ganhadora de dous prémios Maria Casares 2004 ao melhor texto original e melhor actor protagonista. A obra será representada, evidentemente, em galego.

A funçom começará às 21'00h. Esta actividade está organizada polo Departamento de Língua Galega da Escola Oficial de Idiomas (EOI) de Ponferrada, dentro do ciclo "Lenguas a escena", que nas seguintes semanas levará ao cenário do Bergidum umha obra em inglês e outra em franzês.

Toño Casais e Artur Trillo, dirigidos por Avelino González som os actores desta obra, baseada em textos de Suso de Toro, Cándido Pazó, Avelino González, Ana Iglesias, Xavier Lama, Marta Echeverria e Manuel Nuñez Singala. O espaço escénico e vestiário é de Carlos Alonso. Nesta ligaçom podem ler umha entrevista com Toño Casais, um dos actores.

Para o movimento de defesa da língua e cultura galegas no Berzo é importante á celebraçom de actos como este que hoje aqui resenhamos, e importante será conseguir que haja um publico numeroso na representaçom, nom só para asistir ao bom trabalho de Talia, mas também para animar à direcçom do Teatro, aos seus responsáveis, que também há público para o teatro em língua galega na capital do Berzo, e que devem animar-se a contar no seu programa com as companhias galegas, e darmos assim um passo mais na normalizaçom da nossa língua nesta comarca arraiana.

Confesom da confusom ou confusom da confesom

2005-01-20T15:43:00.000Z

Já sabemos que cada quem fala da feira segum lhe vai nela. E parece ser que há alguem por aí sementando a confusom e falando de mim (mira tu que perda de tempo, falar de mim pudendo falar de cousas interesantes; mas bom, de todo tem que haver na vinha do senhor...) contando algumhas que outras mentiras, meias verdades e meias mentiras. E poucas verdades.

Como cada quem é livre de fazer o que queira com a informaçom que lhe chega, mesmo de procesá-la e aceitá-la como verdade, eu fago aqui o meu prego de descargos, e confeso a minha maldade intrínseca. A seguir, a minha confesom, que nom é mais que umha parte da minha confusom, sabendo que ao admitir as minhas culpas poderia ser condeado ao ostracismo perpétuo ou eterno. E é que os caminhos do senhor som inexpugnáveis... (Duas alusons ao senhor em menos de oito linhas, vou-me superando).

Confesom da confusom ou confusom da confesom

Eu, declaro solenemente que som um especialista em meter-me em organizaçons nom políticas e politizá-las, e logo reduzi-las, porque som um pouco gíbaro, a um marxinal reino de mim mesmo, um reino onde só eu reino, e onde todos me chamam "me-rei" como mostra de respeito e devoçom.

Mas nom só isso. A minha comida preferida som os rapazes assados com patacas, tenho rabo e cornos, e nas noites de lua cheia saio polas ruas a chupar-lhe o sangue aos nacionalistas de boa fé.

No meu curriculum também podo incluir que fum membro fundador de Al-Qaeda (de facto, confeso que eu som Bim Ladem, só que me caracterizo bem para fazer os vídeos que mando por internet), e também fum eu o culpável do desastre da armada invencível, da morte de Paquirri e da perda de Cuba.

Antes disso, já algumha cousinha andivera a fazer traicionando a Viriato, pastor lusitano valente e generoso, e impedindo (com um corte de tráfico na praça de Galiza em Compostela) que o escrito dos Reis Católicos perdoando a vida a Pardo de Cela chegara a tempo.

Por suposto, som um agente do espanholismo e, ademais, os serviços secretos portugueses ingresam-me na conta todos os meses 20.000 euros para os meus trabalhos de evangelizaçom reintegracionista.

A minha última inconfesável treta levo-a a cabo no Berzo, onde pretendo constituir umha secta secreta clandestina e subersiva, com claros matizes de lógia masónica e clube de fans, para politizá-la até tal ponto que dentro dum par de meses, ou menos se calhar, os seus membros e mais eu, quando escuitemos umha gaita, quando escuitemos um pandeiro, rubamos à montanha, colhamos a metralheta e iniciemos a luita armada. Imos montar a de dios-es-cristo!

E, por suposto, o primeiro que imos fazer é voar todos os repetidores que transmitem a TVG para o Berzo, porque som um elemento desestabilizador. Imos meter uns virus nas televisons para que só sintonicem os canais portugueses. Ides-vos cagar polas trancas down!

E depois disso já tenho todo preparado para dar o salto até Salamanca e Valhadolid, onde criaremos os nossos grupos de vangarda entre as elites intelectuais para no praço nom maior dum ano poder tomar por assalto com as nossas tropas a sede da Real Academia Espanhola da "Lengua" e obrigar a todos os académicos que nom morram na batalha a assinar umhas novas normas REINTEGRACIONISTAS para o espanhol... Hahahahaha, hahahaha, hahahahahaahahaha,... entom controlaremos o mundo hispano e saltaremos até América Latina, onde os reintegracionistas (disfarzados de brasileiros) levam anos formando células lingüísticas durmintes que invadiram toda centro e sur américa. E daí a controlar os Estados Unidos haverá um pequeno passo. Pequeno para a humanidade, mas vital para desterrar a norma ILG do mundo dos vivos, e devolvé-la ao mundo dos mortos de onde nom tinha que ter saido...

(...)

E até aqui a minha confusom mental. Tantas horas diante do computador penso que me estám a rebrandecer o seso e a esmendrelhar a neurona que ainda me funcionava. Disimulem-me o detalhe, mas eu marcho. Que la gracia de dios y la bendición de cristo sea con vosotros, podeis ir en paz. Demos gracias al senhor. (meu deus! outra vez o senhor esse, quem será? Que santo antom me colha confesado!).

Umha campanha informativa que nom informa

2005-01-19T21:44:00.000Z

Por Igor Lugris e Aniceto Reyes,

membros da Plataforma Berziana polo NOM

à Constituiçom Europeia

Ponferrada, 15 de Janeiro de 2005

O Congresso dos Deputados espanhol aprovou, por prática unanimidade, a proposta do "progressista" governo do PSOE, a convocatória do referendo sobre a Constituiçom Europeia. Incrivelmente, nom houvo um só grupo político, um só deputado ou deputada, que se abstivesse (excepto um membro da Cámara que se enganou ao votar). A cámara de supostos representantes aprovava assim convocar um referendo sobre esse texto chamado Constituiçom Europeia, a celebrar só um mês e dez dias depois. Mas, qual é o problema?, dirám alguns. Que motivos ia levá-los a votarem contra a celebraçom desse referendo ou a se absterem?, perguntaram outros. A Plataforma Berziana polo NOM à Constituiçom Europeia tem claro qual é o problema: o dia que se aprovou a realizaçom desse referendo, praticamente os 99'9% dos súbditos do Reino de Espanha (quer dizer, todos e todas nós), nom conhecia praticamente nada do texto sobre o que terá que dar o seu parecer. A Constituiçom Europeia é umha completa desconhecida. Como é que se pode aprovar realizar um referendo, num prazo de menos de mês e meio, sobre um texto, um extenso texto, de que praticamente ninguém leu nem a primeira página?

Tanto o PP como o PSOE (e o resto das organizaçons políticas presentes naquela instituiçom), tenhem feito todo o possível para que chegássemos ao mês de Janeiro de 2005 sem saber nada de nada do que realmente di e o que realmente significa a Constituiçom Europeia. O seu objectivo, conseguido, era realizar um referendo sem informaçom, um referendo em que as pessoas que vaiamos votar o fagamos a partir da maior ignoráncia possível sobre o que realmente imos votar. A campanha institucional que o Governo lançou desde começos deste ano, para tentar diminuir a mais que previsível alta abstençom, persegue esse mesmo objectivo.

Se nom fosse porque estamos a falar dum assunto sério, em que a classe trabalhadora, as mulheres e os jovens, em que os povos e as naçons sem Estado jogamos muito, a campanha sobre a constituiçom e polo voto no referendo pareceria outro mais desses insuportáveis programas de humor medíocre que abundam nos canais de televisom. Mas o pior nom é ver umha série de pessoas, ou personagens, ou inclusive "personagenzinhos", a recitar artigos (cuidadosamente escolhidos) do texto em questom.

A verdade é que nom entendemos que valor poda ter ver a tam eminentes pensadores e intelectuais como Cruyff ou Butragueño -por citar só dous casos- ler em voz alta a Constituiçom, mas é claro que tenhem todo o direito do mundo a apoiar a Constituiçom, igual que qualquer pessoa. Unicamente chamamos a atençom sobre o facto de que eles, e outros, estám dispostos a mostrar-se publicamente a favor em troca dumha suculenta (supomos) quantidade de dinheiro que terám levado das arcas públicas (quer dizer, de todos nós) por fazer esses ridículos anúncios.

Mas já dizemos que isso nom é o pior. O pior, o realmente grave, o que nom deveria ser permitido, é que a campanha do Governo é evidentemente partidária. Nom é umha campanha informativa sobre a Constituiçom Europeia, mas umha campanha a favor dessa Constituiçom Europeia. E isso é o que nom é completamente legal. O PSOE, o PP e todas as demais organizaçons políticas podem ter a sua postura, e defendê-la, e fazer campanha polo sim, mas o Estado, supostamente, mantém-se neutral ante essa consulta, nom apoia o SIM ou o NOM, porque (da sua óptica) tam democrático e respeitável será um resultado como outro. Como é possível entom que o Bourbon Juan Carlos, máxima autoridade e representatividade do Estado espanhol, designado Rei da Espanha pola graça do que tinha a graça de Deus, faga campanha a favor do SIM em toda a ocasiom que se lhe apresenta? Que sucede, que só considera os súbditos que votem a favor? E que opina dos que votem contra?

Porque a campanha é tam descaradamente favorável ao voto SIM? Pois porque os grandes partidos renunciárom a fazer umha grande campanha (que custa muito dinheiro) pedindo o sim, e optárom por utilizar o dinheiro público, por meio do Estado, para a fazerem. Qual se nom é o motivo de que saiam umhas pessoas lendo um texto repleto de tam boas palavras que é impossível estar em desacordo? Direitos humanos, protecçom da infáncia, dignidade, paz, solidariedade, respeito mútuo, defesa do património cultural, etc.... Quem vai dizer que NOM, quem se vai atrever?

Mas, porque nom falam sobre outras partes da Constituiçom Europeia? Por exemplo, a campanha "informativa", poderia informar-nos de que a Constituiçom Europeia nom é democrática: foi elaborada por um grupo de notáveis, eleitos directamente polos presidentes de Governo de cada Estado membro da UE, que careciam de toda legitimidade para iniciar um processo constituinte. Mas, além disto, poderiam contar-nos como com esse texto em vigor, as decisions realmente importantes para o futuro da Uniom Europeia ficam em maos dum Exjecutivo europeu que nom vai ser eleito directamente polo povo, e que essa constituiçom nom reconhece as diversas formas de democracia participativa ou directa possíveis. Ou que a Constituiçom se blinda ante qualquer futura reforma, ao ter que ser unanimemente aceite por todas as partes integrantes da UE para se levar a cabo.
Também poderia a campanha "informativa" esclarecer que a Constituiçom Europea consagra legal, jurídica e politicamente a ortodoxia liberal como único quadro possível: livre mercado, competitividade económica e economia de mercado. Nom fixa um quadro neutro dentro do qual tenham possibilidade de se desenvolver todas as opçons e projectos políticos. Podiam explicar-nos como a Constituiçom Europeia nom permitirá a nengum povo decidir livremente o seu destino, a pesar de a UE ter assinado o Pacto dos Direitos Civis e Políticos de 1996, onde se reconhece o inalienável direito à autodeterminaçom dos povos. Poderiam contar-nos que a UE reserva para si própria, com esse texto na mao, o direito à intervençom dentro dum Estado membro no caso de de que umha maioria social ameaçasse, mesmo pacífica e democraticamente, a legalidade burguesa consagrada, estabelecendo, através da chamada Cláusula de Solidariedade, um imperialismo interno legalizado.

Butragueño, Loquillo, Luis del Olmo, Cruyff e todos os demais deveriam também ler publicamente nas televisons e nas rádios o artigo I.22.1, que estabelece que o Conselho de Europa nom é fiscalizado por nengum órgao e actua por conta própria, exercendo funçons executivas e legislativas, quer dizer, como umha autêntica tirania legalizada, e o III.198, que permite a esse mesmo Conselho de Europa decidir, sem nengum tipo de consulta sobre intervençons militares. Ou também poderia escolher o artigo I.40.1, onde se assume a plena submissom à NATO, ao tempo que se pretende legalizar o direito a intervir em qualquer zona do Planeta onde os interesses dos grandes capitalistas europeus se virem ameaçados.

Seria cómico ver os "personagenzinhos" antes citados falando de machismo e patriarcado, mas também deveriam explicar-nos que o texto constitucional nom recolhe a igualdade entre homens e mulheres como princípio fundamental, e que nom incorpora meios para caminhar para a superaçom do patriarcado, ao tempo que nom reconhece o direito ao aborto livre e gratuito mas sim assume o modelo familizar patriarco-burguês, baseado no matrimonio heterossexual, como o único desejável.

Enfim, poderíamos continuar a citar exemplos sobre o que "falta" na campanha informativa sobre a Constituiçom Europeia, mas talvez o melhor exemplo seja que nem tem sequer informa sobre o facto de que o próprio termo de Constituiçom Europeia é mais do que discutível. Primeiro, porque a Europa é umha realidade geográfica mais ampla que os limites dos 25 Estados que actualmente conformam a UE. E em segundo lugar porque a Constituiçom Europeia, real e legalmente chamada "Tratado Constitucional da UE", nom é mais do que a fusom e actualizaçom num único texto dos Tratados aprovados até o momento, acompanhados dumha declaraçom de direitos do conjunto da populaçom e um sistema de funcionamento dos órgaos de decisom da UE. Nom estamos ante umha constituiçom dumha estrutura política federal ou confederal: é um Tratado entre Estados soberanos, que recolhe claramente que a soberania reside nos próprios estados que formam a Uniom, e só neles, ao tempo que aproveitam para sacralizar as suas fronteiras actuais.

A participaçom popular no desenho, redacçom e aprovaçom do Tratado tem sido a grande ausente. Prova disso é que o referendo de 20 de Fevereiro tem só carácter consultivo, nom vinculante: seja qual for o resultado, o texto estará aprovado porque assim o decide o governo espanhol de turno. E, independentemente do que dixer ZP de cara à galeria sobre a sua vontade de respeitar o resultado, no pouco provável caso de que o NOM seja maioritario na consulta, o Estado espanhol irá sancionar igualmente o texto, e continuará a fazer parte dessa Uniom Capitalista Europeia.

Porque, em definitivo, nom lhes importa nada de nada o que tenhamos a dizer, e borrifam-se para nós. Mas, entre todos e todas, poderemos fazer com que no dia 20 levem um bom susto.

A Galiza Irredenta também reclama o seu património histórico a Espanha

2005-01-19T21:01:00.000Z

Segundo informam nestes dias os meios de comunicaçom, o concelheiro da Cultura de Ponferrada, Manuel Rodrigues (do Partido Popular), reclamou ao Museu Provincial de Leom a devoluçom do Edito de Augusto, documento em bronze escrito no ano 14-15 anterior à nossa era, e que é considerado polos especialistas como o mais importante dos achados romanos no norte da península. O documento em questom foi encontrado perto da localidade berziana de Bembibre no ano 1999, ficando depositado desde entom no Museu Provincial de Leom (província em que se enquadra oficialmente a comarca galega do Berzo).

Segundo Manuel Rodrigues, a sua reclamaçom é motivada porque "os demais também exigem o seu património", em referência à reclamaçom por parte da Catalunha dos arquivos cataláns referidos à guerra de 1936-39 custodiados, depois de serem espoliados polo fascismo, em Salamanca. Segundo o concelheiro ponferradino do Partido Popular (a mesma organizaçom que se nega a que tais documentos sejam devoltos à Catalunha), o documento romano deve ser devolto à comarca berziana. "No seu dia, tivemos oportunidade de retê-lo e nom pudemos fazê-lo, e agora, com esta voragem de reclamaçons, nós nom imos ser menos", explica. E ainda acrescenta: "no seu dia, pedimos umha réplica e ainda nom a temos, mas agora somos mais ambiciosos e imos pedir o que cremos que é de lei, o documento original para que poda estar depositado num museu berziano". O responsável polo departamento da Cultura explicou aos meios de comunicaçom que o património histórico berziano deve ser devolto a esta comarca, e em concreto este documento tem de voltar imediatamente à comarca e à cidade de Ponferrada, para poder fazer parte dos fundos do Museu do Berzo.

Cumpre lembrar que o Partido do Berzo (PB) já solicitava neste começo de ano, simbolicamente, numha carta aos "Reis Magos", que todas as autoridades competentes reclamassem "o legado patrimonial" que se acha fora da comarca, referindo-se em concreto a este edito de Augusto e também ao Idolo de Noceda e ao Calis de Penalva.

Para além da hipócrita postura que o Partido Popular demonstra ter com esta iniciativa no tema do Património Histórico, Manuel Rodrigues e o conjunto da corporaçom municipal do PP de Ponferrada (pois é impossível pensar que tal iniciativa nom conta com o apoio do alcaide, Lopes Riesco), venhem assim demonstrar, sem o pretenderem, que o Berzo nom é Leom. Pois é evidente que, se reclamam a devoluçom do património a um museu provincial leonês, é porque consideram que a nossa comarca arraiana nom fai parte dessa "província" espanhola, e que o nosso património deve estar dentro do nosso território.

O tema da territorialidade no Berzo nom está tam fechado como pretende a Junta de Castela e Leom e o PP dessa comunidade autónoma. Neste senso, devemos lembrar que já no último congresso do PP de Castela e Leom, realizado há uns meses, um sector do PP berziano apresentava umha emenda aos textos oficiais, que nom prosperou, em que solicitava que o partido da direita espanhola asumisse a identidade berziana e permitisse ao PP berziano funcionar como se fosse umha organizaçom provincial, dependendo directamente do comité de direcçom autonómico, e nom do comité provincial de Leom. A proposta foi rejeitada no congresso de Castela e Leom, onde os responsáveis do PP nom queriam nem ouvir falar do tema, mas ganhou muitíssimos apoios entre o PP berziano e muitos alcaides, concelheiros e filiad@s dessa organizaçom. E é que muitos membros do PP, e também do PSOE, continuam se entender o que fam dependendo, política e organicamente, dumha província que nunca os tivo em conta mais que para somar votos os dias das eleiçons.

O PSOE também move ficha neste debate sobre a reformulaçom político-administrativa do Berzo, e nom doutra forma há que entender a reclamaçom que nestes dias de começo de 2005 fazia o Presidente do Conselho Comarcal do Berzo, Ricardo González Saavedra, no sentido de que o organismo comarcal assumisse as competências das doze comunidades de municípios que actualmente coexistem nesta comarca, formada por 37 concelhos. Assegurava González Saavedra que, de recaírem sobre a administraçom comarcal as competências que agora dependem destes doze entes supra-municipais, o serviço se veria logicamente melhorado em vários aspectos, tanto no económico como no de atendimento às pessoas principalmente.

Um movimento "provincialista" no Berzo, que reclame a constituiçom dumha província berziana em Castela e Leom, e portanto dumha comarca autónoma frente a Leom, posta a negociar em pé de igualdade com Valhadolid (capital da comunidade autónoma castelhano-leonesa), é um passo importante que pode propiciar um cenário mais favorável para a reivindicaçom da reintegraçom da comarca berziana na Galiza. Os diversos movimentos, colectivos e correntes que podemos estar em prol dessa reivindicaçom devemos estar atentos e dispostos a trabalhar para aproveitar um futuro cenário nesse sentido. As futuras reformas do Estatuto de Comarcalizaçom do Berzo e do Estatuto de Autonomia de Castela e Leom som importantes citas que, do ponto de vista cultural e político, temos de ter já na nossa agenda.

A defensa da galeguidade das terras berzianas, do ponto de vista cultural e lingüístico, mas também do ponto de vista político, devem ser o norte da nossa actuaçom. Da esquerda independentista, sempre teremos a mao tendida para avançar neste sentido junto com quem, honestamente, quiger realizar o caminho que conduza para um Berzo ceive numha Galiza unida e livre.

Igor Lugris (membro da Assembleia Comarcal de NÓS-Unidade Popular da Comarca do Berzo e da Direcçom Nacional)

Nom é umha cópia do Jaureguizar : )

2005-01-19T16:09:00.000Z

Agora, vendo o blog, vam-me acusar de ser um copiom, e ter-lhe calcado o blog ao bom amigo Jaureguizar, por ter escolhido o mesmo desenho. Mas, que culpa lhe tenho eu se ele escolheu a imagem para o blog mais esteticamente interesante e bonita?. Há outras muitas opçons, mas é que eu também prefiro esta.
Aguardo que me perdoe. E que isto nom enturbie a nossa amizade.

E sobre o nome do blog: é evidente. Vós vistedes algumha vez um OVNI, com a completa e segura certeza de ser um OVNI? Porém, é impossível aceitar, desde umha postura minimamente inteligente, que nom existam. O mesmo me passa a mim com as isoglosas.

Lembro que quando estudava aquela cousa que se chamava BUP (bacharelato unificado polivalente, toma!), em Compostela, nós diziamos que a isoglosa da gheada em Compostela devida passar, mais ou menos, pola sede do BNG (que na altura estava na rua Santiago de Chile, no espantoso ensanche compostelam). Era umha brincadeira, mas o comentário tivo tanto sucesso, que devia agachar qualquer cousa de verdade.

O das isoglosas, nom confundir com as isobaras, é um grande mistério para mim desde sempre. E isso que estudei 8 anos de Filologia Hispánica em Compostela (por certo que, em séptima convocatória, conseguim um sobresainte em lingüística románica).

Pontoalizaçons

2005-01-19T15:51:00.000Z

No comentário anterior, esquecim (e é de justiza lembrá-lo), que FC tem recebido ajudas e colaboraçons de diversas entidades nos últimos meses, bem recebendo livros e outro material para as bibliotecas da nossa comarca, bem vendo publicadas suas notas de imprensa e recolhidos os seus actos na rede. Entre essas entidades, que aparecem recolhidas no web de Fala Ceive, há algumhas reintegracionistas e outras nom-reintegracionistas. Assim, por exemplo, junto com AGAL, também está A Mesa pola Normalizaçom Lingüística; ou junto com NÓS-UP o Bloque Nacionalista Galego de Vigo; etc.

A lista completa, para nom levantar suspicácias, e que também inclue a pessoas a título individual que tenhem colaborado com Fala Ceive na campanha de recolhida de livros é a seguinte, copiado do web de FC (e lamento nom ter tempo para pôr a ligaçom com os seus webs de todas elas):

Concello de Ribadeo, área de cultura
Concello de Pontevedra.
AGAL, Associaçom Galega da Língua.
Editorial Xerais de Vigo.
Biblioteca Central da Universidade de Vigo.
Xornal A Peneira, da Comarca do Condado.
Santiago Jaureguízar, xornalista (Lugo)
BNG da Comarca de Vigo.
Biblos Clube de lectores
Librería Torga de Ourense.
Editorial Difusora de Artes, Letras e Ideas.
Alexandre Banhos (Vigo)
Mesa pola Normalización lingüística de Santiago.
Ana Romani, xornalista da Radio Galega (Compostela)
Asociación de Escritores en Lingua Galega.
Anxo Torres Cortizo (Bueu)
Consello da Cultura Galega.
Primeira Linha.
Biblioteca da Universidade de Compostela.
Nós-Unidade Popular.
Diario de León (Delegación do Bierzo)

O listado é o suficientemente amplo para demostrar que isso de que FC se tenha convertido num grupelho exclussivamente reintegracionista é falso. Nom se passaria nada se for assim, mas nom o é. Ainda assim, haverá quem siga insistindo no contrário.

Explicaçons e desejos

2005-01-19T13:48:00.000Z

Reproduzo aqui o texto que deixei no blog do Jaureguizar, a propósito dumha polémica sobre "normativas" no Berzo.
Outro dia, escreverei mais. Hoje nom podo, que tenho reuniom de Fala Ceive (ou Ceibe). ; )

Vou ver se consigo escrever algumha cousa com sentido explicando-me um pouco. Primeiro, pedir-lhe ao Jaure que permita comentários anónimos no seu blog, porque agora tivem que dar-me de alta e criar um blog para poder escrever. E agora que farei com ele (www.ovniseisoglosas.blogspot.com)? Manté-lo? Se nom som capaz de escrever todos os dias no meu caderno de escrever, vou ter agora a responsabilidade de escrever no blog? Jaure, a responsabilidade é tua ;)
E indo ao tema. Nom estaria mal que a soluçom para o problema da língua fora a que aponta o Jaureguizar. Eu, e seguro que outros e outras muitas, aceitariamos encantados/as: se com umha moratória temporal (ponhamos por exemplo, cinco ou oito anos? ou mais? dez?), por parte do reintegracionismo, conseguiramos resolver a questom da perda galopante de falantes e da rutura geracional na transmisom do idioma (no Berzo e no conjunto da Galiza), se com isso conseguiramos dar-lhe a volta às estatísticas, eu desde logo assinava agora mesmo. Nom ia ser por mim que nom conseguiramos um logro tam importante. Entendo que depois dessa moratória, onde os gais -perdom, quigem dizer, @s reintegracionistas-, estiveramos no armário, bem gardadinhos, teriamos direito a sair novamente do armário e publicamente demostrar, defender e actuar livremente conforme com a nossa escolha normativa; e com mais liberdade ainda que antes, sabendo que o grave problema já estava resolto.Repito, nom estaria mal. Mas a realidade parece demostrar que isso nom funciona. Repasemos a história e vejamos se atopamos algum caso semelhante, similar, que nos poda aportar luz.Por exemplo: a moratória reintegracionista no ensino. Nom sei se foi umha moratória pactuada, se foi um acordo tomado por algum colectivo, organizaçom, comité clandestino, ou similar; ou se foi simplesmente umha derrota em toda regra; ou se foi por culpa do cansaço e o aborrecimento. Mas, em todo caso, seja como for, o certo é que de todos aqueles e aquelas profesoras de língua galega em secundária que a meados de 80 (quando eu estudava secundária num liceu de Compostela), impartiam as suas aulas na, entom ainda existente, normativa de mínimos reintegracionistas ou directamente de máximos reintegracionistas, practicamente nom fica nada de nada. Pequenas exceiçons. No meu liceu, onde no departamento de língua e literatura galega practicamente nom havia um só profe da norma "oficial", isto é ILG-RAG, quando eu estudava, a dia de hoje ninguem se sae da norma "oficial" (ILG-RAG), ou quase ninguem (porque nom sei se o Foz sigue dando aulas de língua em nocturno).E isso sucedeu também no resto da Galiza: os profes, passarom-se em massa à norma oficial. Nem sei se todas/os a umha, ou pouco a pouco; mas, quando menos, vai para mais de dez anos que a situaçom lá é bastante "normal" nesse sentido: quer dizer, normativa oficial e ponto. Mesmo som poucos os ou as profes que lhes falam ao seu alunado da existência dum conflito normativo. Derrota ou moratória, para o que nos interesa é o mesmo.
Pois bem, depois de todos estes anos de Normativa ILG nos liceus (e nos colégios de primária), avançou muito a situaçom? Saem neo-falantes do ensino? Conseguimos reduzir o número de rapazes que entram no ensino galego-falantes practicamente monolíngües, e saim espanhol-falantes practicamente monolíngües? Estamos dando-lhe a volta às estatísticas que anunciam que em breve as novas geraçons seram maioritariamente, e muito maioritariamente, espanhol-falantes? Pois parece que nom. Parece que a "normalidade" que se pedia desde diversos ámbitos no tema da normativa no ensino, nom está servindo para avançar. Mas, o que é mais grave, nom está servindo nem para manter as posiçons. O único que conhecemos é um grande, enorme, grave, retroceso.Perdeu-se, completamente, tensom normalizadora nesses ámbitos. Do liceu saem, no melhor dos casos, rapazes e rapazas com a asignatura de língua galega aprovada, e nada mais. Também saem com a asignatura de matemáticas aprovada, mas isso nom significa que todos e todas vaiam ser matemáticos de profisom. Ou biólogos. Ou profes de gimnásia. Vaia, que no sentido de conseguir falantes (noutros aspeitos ainda poderiamos debatir), nada de nada. Como diziamos na Corunha, quando eu vivia lá, ainda fazendo a EGB: nasti de plasti. Que bem significando, em giro mais de moda, e mais do PP: zero patatero. Nada.
Mas, junto a este ejemplo (e lamento extender-me tanto) temos algum outro. Por ejemplo, o importante trabalho no terreo da normalizaçom, a todos os níveis, lingüística, desenvolto nos últimos anos por diversas entidades que se dedicam ao tema. Muitas dessas entidades, algumhas das mais activas, reintegracionistas. O caso de Artábria (em Trasancos) é um evidente, e já clásico, exemplo. Nom é que tenham criado o "paraiso" da normalizaçom, nem que tenham a fórmula mágica que todo o resolve, mas derom, e siguem a dar, com muitas dificuldades, mas com muita audácia, ilusom e esforços, importantes pasos. O mesmo poderiamos dizer de outras entidades por todo o país, tais como os centros sociais que nos últimos anos se tenhem vido criando em diversas localidades, e que com os seus problemas, limitaçons e dificuldades (e com muitas críticas que lhe poderiamos fazer) desenvolvem umha actividade muito importante, cobrindo um espaço que estava aí, aguardando que alguem fora ocupá-lo. E foi o reintegracionismo (no sentido mais amplo da palavra) quem o fijo: Alto Minho, a Revolta, a Reviravolta, Gentalha do Pichel,...Até o próprio Jaureguizar tinha que reconhecer num comentário neste blog, que os rapazes e rapazas novas que se interesavam pola língua eram todas reintegracionistas. Nom é certo que todos sejam, porque há muita juventude nom reintegracionista preocupada pola língua e fazendo cousas. Mas há um grande e importante número de reintegracionistas activos, pode que até sejam maioria se de contar se tratara.
Se nom, nom poderiamos entender que o magnífico Portal Galego da Língua (www.agal-gz.org), mantido pola AGAL, fora um dos webs mais visitados de toda Galiza (segundo os dados de Alexia). E outras muitas iniciativas existentes no país, e que se lhe devem a sectores diversos, mas que tenhem em comum o reintegracionismo.Se hoje em dia existe um mínimo de trabalho de normalizaçom lingüística, entre outras cousas é devido a que o reintegracionismo está aí. Presente no día a día, e logrando pequenos avanzes.Que também comete errores? Evidentemente. Se nom, o reintegracionismo nom estaria formado por pessoas, mas por seres sobrenaturais.
Em fim, que toda esta literatura, tinha como finalidade explicar que o problema no Berzo nom é a escolha normativa que fagamos os membros de FC (ou a escolha que fagam outras pessoas que defendam a nossa língua e cultura nessa comarca). O problema é ser capaz de aceitar a diversidade, a pluralidade, ser capaz de trabalhar em aquilo que nos une, por riba das diferenças que podamos ter. E o que nos une é a língua.Para alguns, tratará-se da "lingua", para outros (nos que me incluo), tratará-se da língua, mas em todo caso todos e todas sabemos que nos referimos ao mesmo, e que o debate normativo nom deve impedir o trabalho normalizador. Na CAG parece que é impossível que reintegracionistas e nom-reintegracionistas trabalhem juntos. No Berzo, onde temos muitos outros problemas, parece que esse nom nos estava a afectar. Conseguiramos solventá-lo com inteligência, compromisso e respeito.
O problema no Berzo nom é que a gente poda ler galego em tal ou qual normativa, o problema é, por exemplo, que os meios de comunicaçom impresos desta comarca nom recolhem nom recolhem os comunicados de imprensa emitidos em galego (e dá-lhes igual a normativa empregada: simplesmente, nom os recolhem), e temos que enviá-los bilíngües, sabendo que eles simplesmente lem a versom em espanhol, e botam a parte redigida em galego (seja qual for a normativa) ao cubo do lixo.
O problema no Berzo é que nom podemos participar nas rádios da comarca falando em galego (defendas a normativa que defendas), e sempre temos que cambiar a chaqueta e falar em espanhol ou assumir que nom sairemos na rádio falando do problema lingüístico-cultural no Berzo.
O problema é que a TV comarcal nom emite nem meio segundo na nossa língua, e nom recolhe as actividades (de FC ou de outros colectivos) sobre o tema. Da TV espanhola na sua desconexom "autonómica" já nem falemos: pensade que é a mesma para o Berzo que para Burgos, Ávila ou Valhadolid, e com isso está tudo dito.
O problema é que as instituiçons (Junta, deputaçom de leom, concelhos vários, mancomunidades,...) passam ampliamente do tema, ignora-no, e nom fam practicamente nada pola língua (salvo contadas exceiçons, como por exemplo a alcaidesa e o concelho da Veiga de Valcarce, do PSOE, que também é a reponsável de Cultura no Conselho Comarcal, e que é umha defensora da língua e cultura autóctona do Berzo, o galego),(ou o próprio Conselho Comarcal, que algumha pequena cousa, pequena mas importante, tem feito).
Esses, e outros, som os problemas do Berzo. E nom parece que a retirada às quarteis de inverno por parte dos reintegracionistas vaia servir para solucioná-los. Antes bem, a nossa presência activa, junto com a de aquelas outras pessoas nom reintegracionistas mas dipostas a embarcar-se neste nave, é a que fará que avanzemos. Pouco a pouco, de certo, mas avancemos. Com mil e um problemas, mas avanzemos. Com mil e um errores, mas avanzemos. E disso é do que se trata.
Porque, como nos ensina a realidade, no tema da normalizaçom lingüística, nom dar passos adiante significa retroceder. E nisso, Galiza tem experiência avonda. Já vai sendo hora de que colhamos experiência em avançar.
Desde logo por mim, e pola corrente ou sensibilidade que eu poda representar nesse sentido no Berzo, nom vai ser. A minha mao sempre estará disposta.
Termino citando o correio que nestes dias me escrevia um bom amigo (por aclarar: nom reintegracionista e do Bloque), referindo-se ao trabalho que FC entidades desenvolve no Berzo: "Alén de nós non existe máis liña de defensa. Non podemos caer".

Nom há mais barricadas onde retroceder. Nom existem os quarteis de inverno. Nom temos retagarda. Desde aqui, so podemos ir cada adiante. Avançar. Avançar. Avançar.

Igor